Тазалыкъ учун ябушув гючлене


Белгили болгъан кюйде, 2019-нчу йылны башындан тутуп, бизин республикабызда айлана якъны аманлыгъын ва тазалыгъын болдурув булангъы гьаракатны камиллешдирмек муратда пайдаландырывгъа-ишге янгы низам берилди.



Шогъар байлавлу болуп Дагъыстанны экология ва табии байлыкъларыны министри Набиюлла Къарачаев республикабызны маълумат къуралларыны къуллукъчулары булан яшавлукъ ва шолай да производство алагъожаланы, къатты къалды-къулдуланы гележекдеги ишлетивюне асасланып, «Дагъыстан» деген маълумат агентлигинде прес- конференция оьтгерди.



– Гьали болгъунча бизин республикабызда ер-ерде жыйылгъан чёп майданлардан къалды-къулдуланы жыягъан, ташыйгъан хас операторлар иш гёре эди буса, – деп узатды оьзюню сёзюн Набиюлла Абдулманапович, – бу йылны башындан тутуп, шо иш булан регион операторлар машгъул болажакъ.



Операторну ва регион операторну не башгъалыгъы бар? Биринчилей, алдагъы операторлар жы­йылгъан чёпню оьзлер сюйген заманда, оьзлер сюйген гьакъны да жыйып алып айландыра эди. Шо саялы да айлана якъны тазалыгъын сакълав къы­йынлашып, санитар гьал бузукълашагъаны ачыкъ болуп гёрюндю. Регион операторлар булан буса хас дыгъарлар байланажакъ ва къалды-къулдуланы ташлайгъан тайпаланы янындан разисизликлер тувулунмасын учун тёлев гьакъ багьаланы ДР-ни Гьукуматыны янында иш гёреген тариф къуллугъуну янындан гьар шагьаргъа, районгъа дегенлей айрыча токъташдырылажакъ.



Шолайлыкъда, алда айлана якъ къалды-къулдулардан зараллана эди буса, 2019-нчу йылда ала-гъожаланы, чёплени 500 минг тоннасын ишлетмеге имканлыкълар болдурулажакъ. Гележекде буса шо санавну дагъы да 500 минг тонгъа ерли артдырмакъ учун ишлетеген ерлер дагъы да ачылажакъ.



Къатты къалды-къулдуланы ишлетеген янгы низамны пайдаландырывгъа берилгени гьакъда айтгъан сонг Н. Къарачаев прес- конференцияда ортакъчылыкъ этген республикабызны маълумат къуралларыны къуллукъчуларыны янындан берилген соравлагъа да жаваплар къайтарды.



Авторизация
*
*
Регистрация
*
*
*
Согласны с условиями сайта?
Генерация пароля