Тамазатёбеде – спорт байрам

   

Пятница, 13.04.2018г. — «ЁЛДАШ».


Апрель айны башында Тамазатёбе (Бабаюрт район) юртда столда ойналагъан теннисден район оьлчевде ярышлар оьтгерилди. Ярышлагъа районну юртларындан гелген спортчулар Абдурашит Терикбаевни эсделигине багъышлангъан савгъатлагъа ес болмакъ учун гюч сынадылар. Ярышлар школаны спорт залында Россия Федерацияны Гимни согъулуп башланды.


 


Гиришив сёз булан спорт чараланы юрт школаны директоруну тарбиялав ишлеге къарайгъан заместители Элмира Мингалиева ачды. Ол жыйылгъанланы чакъырылып гелген къонакълар булан таныш этди. Шо гюн ярышлагъа гелген гьюрметли къонакъланы арасында Бабаюрт районну ёлбашчысы Элдар Къарагишиев, Дагъыс­танны промышленност ва сатыв-алыв министрни биринчи заместители Казбек Къандавуров, Бабаюрт администрацияны яшёрюмлени, маданиятны ва спортну ишлерине къарайгъан бёлюгюню ёлбашчысы Илмидин Абдуразакъов, Терикбаевлени тухум — тайпасы бар эди.



Ярышланы районну ёлбашчысы Элдар Къарагишиев ва Абдурашит Терикбаевни уланыны уланы Тимурну авлети гиччи Абдурашит Терикбаев теннис столда ракеткалар булан биринчилей гюч сынап ачды. Шолайлыкъда, ярышлар башланды.



Ярышланы судьясы Элдар Межитов оьзюню ишин яхшы билегенин гёрсетди. Ортакъчылыкъ этген теннис оюнну усталары гьариси къазангъан ерлерине гёре тийишли кубоклар, медаллар, грамоталар булан савгъатланды. Ачыкъ этип айтгъанда, 30 йыллыкъ чагъына етишмейген яшёрюмлени арасында биринчи ерге Раут Яллыев (Тамазатёбе), экинчи ерге Элдар Девлетмурзаев (Бабаюрт), уьчюнчю ерге Магьаммат Гьюсейнов (Тамазатёбе) ес болдулар. 30 йылдан 50 йылгъа ерли оьмюрдегилени арасында биринчи ерни бабаюртлу Шигьабутдин Шигьабутдинов, экинчи ерни герменчикли Анзор Солтанов ва уьчюнчю ерни бабаюртлу Осман Магьамматгьажиев алдылар. «Уьс­тюнлюк учун къаст къылгъан» деген хас кубоклар тамазатёбели Межит Межитовгъа ва бабаюртлу Осман Магьамматгьажиевге тапшурулду. «Ярышланы лап да эсли ортакъчысы» деген кубокгъа тамазатёбели Къурбан Вагьабов лайыкълы болду.



Ярышларда ортакъчылыкъ этгенлеге де Терикбаевлени варислерини янындан грамоталар ва олай да эсделик савгъатлар тапшурулду. Гезиги гелгенде ярышланы башында ва ахырында школаны охувчу яшлары оьзлени гиччи концерт программасын гёрсетип, жы­йылгъанланы гёнгюн алгъанны ва ругьун гётергенни де эсгерме сюемен.



Бабаюрт районну ёлбашчысы Элдар Къарагишиев ярышланы оьтгермеге болушлукъ этген саялы юрт администрацияны ёлбашчысы Магьач Имангьажиевге ва школаны директору Ренат Абдулгьамитовгъа баракалла айтып, гьюрметли грамоталар тапшурду. Ренат Абдулгьамитов да Абдурашит Терикбаевни къызыны уланы экенни эсгерме тюше.



Булай спорт ярышлар чакъ-чакъда оьтгерилсе пайдалы болажакъ. Яшёрюмлени генг кюйде спортгъа ва физкультурагъа къуршамакъны уллу маънасы бар. Озокъда, шулай ярышлар яшёрюмлени гиччи ватанын – ата юртун сюймеге ва яшавдан гетген эревюллю адамларыбызны эсделигин сакълавда оьз къошумун эте.



 

Бэлла Гьажигелдиева,


Россия Федерацияны журналистлерини союзуну члени.


Суратда: ярышны ортакъчылары.



Авторизация
*
*
Регистрация
*
*
*
Согласны с условиями сайта?
Генерация пароля