Талаплар гьисапгъа алына


Дагъыстан Россияны къыбла боюнда ерлешген аграр республика гьисапда танывлу. Айтмагъа сюегеним, республикабызны авлакъчылары ва гьайванчылары бар имканлыкълардан толу кюйде пайдалансын учун оланы гьар тюрлю къуллукъларына-талапларына пачалыкъны, ерли гьакимлени янындан да къол ялгъамагъа тюше. Неге десегиз, онгайлы шартланы яратыв юрт хозяйство продукция болдурув булан машгъул болагъанланы гележек учун да ругьландыра. Шолайлыкъда, олар янгыз оьз къазанчын гьисапгъа алып къоймайлы, къоллавчуланы пайдаларын якълама да муштарлы бола.



Бугюнлерде Магьачкъалада оьтгерилген юрт хозяйство ярмакюню барышы да шону ачыкъдан ташдырды демеге ярай. Ярмакюде тахшагьарыбызны Пушкинни атындагъы орамында республикабызны гьар тюрлю районларындан гелген мал болдурувчулар булан янаша юрт хозяйство малланы ишлетеген предприятиелер, сабанчы агьлюлер ва шолай да онгача иш гёреген тайпалар ортакъчылыгъын болдурду.



Авлакъ ниъматланы, емишлени, юзюмню, емишлерден гьазирленген татли сувланы, акъкъатыкъланы, эт малланы, дарман отланы ва шолай башгъаларыны сан янына, багьаларына тахшагьарыбызны алывчулары багьана тапмасдай ярмакю бу гезик къурумлу кюйде оьтдю демеге ярай.



– Сатывчуланы ва алывчуланы разилигин къазанмакъ учун ярмакюлени оьтгеривде тийишли низам болмагъа тюше, – деди шонда ортакъчылыкъ этген Дагъыс­танны Гьукуматыны Председатели Артём Здунов. – Айтмагъа сюегеним, булай гёрмекли уллу чараланы алдында муну оьтгереген шагьар администрациягъа ва ДР-ни юрт хозяйство министерлигине оьзге къурумлар булан байлавлукъда мекенли гьазирлик гёрмек парз. Шагьарлыланы талапларын гьисапгъа алып, сыйлы борчларына жаваплы кюйде янашагъан мал болдурувчуланы гележекге иштагьландырыв да – агьамиятлы масъала.



Алдагъы йылланы сынаву ташдырагъан кюйде, ярмакюлерде мал болдурувчуланы ва алывчуланы арасына ломайчылар, арачылар сугъулуп, багьаланы артдырма къарай­гъанлар кёп бола.



– Озокъда, шону булан дазуланмайлы, оьзге масъалаланы да ёрукълашдырмагъа тюше, – деди Дагъыстанны юрт хозяйство ва сурсат министри Абдулмуслим Абдулмуслимов. – Бугюнгю ярмакюде 100-ден де къолай мал болдурувчулар ортакъчылыкъ этмеге рази­лигин билдирди. Биз де олар учун имканлыкъланы артдырма борчлубуз. Алывчулар булан гьакълашмай да бажарылмай. Олардан юрт хозяйство ярмакюлени шагьардан тышда эркин ерде оьтгерме ярамаймы деп бетлейгенлери де къаршылаша. Тек, мен ойлашагъан кюйде, шагьардан тышгъа бармакъ учун бары да алывчуланы бир йимик имканлыкълары ёкълугъу гьакъда да унутма тюшмей. Уллулар, гиччилер, айта­гъаным, пенсионерлер, загьматны ветеранлары, амалсызлар, сакъатлар къы­йыкъсытылмасын учун ярмакюлени гележекде де тахшагьарны ичинде оьтгермеге умут этиле.



Авторизация
*
*
Регистрация
*
*
*
Согласны с условиями сайта?
Генерация пароля