Супиянатны «Сайламлы асарлары»


Йырым бар йылкъыгъа тенг,


Юлдуз кёклю къалкъым бар.


Йырындан йыраву кёп,


Кёкдей бийик халкъым бар…



Оьтген жумада Дагъыстан Республиканы милли китапханасыны конференциялар оьтгереген залында белгили, пагьмулу шаирибиз, «Тангчолпан» журналны редактору Супиянат Мамаеваны «Сайламлы асарлары» деген янгы китабын малим этив болду. Супиянат Мамаеваны шо китапгъа гирген шиърулары-йырларыны, ону оьзюню яратывчу пагьмусуну айланасында пикру алышдырмагъа белгили алимлерибиз, шаирлерибиз, язывчуларыбыз, жамият чалышывчулар ва ону яратывчулугъун, поэзиясын сюегенлер жыйылгъан эди.



Жыйынны башындан башлап, шаирни поэзиясына гьашыкъ охувчулар, къурдашлары, къаламдашлары ону оьзюн къутлавлардан, къучагъын гюл байламлардан толтуруп къойду. Шаирни янгы китабын малим этив зал толгъан халкъ да булан бек исси башланды.



Эсгерилген жыйынны оьтгермеге бойнуна алгъан къурум комитетни ортакъчысы, филология илмуланы доктору, профессор Малик Гьюсейнов жыйынны ача туруп, лакъыр ана тилибиз къумукъ тилде юрюлежекни эсгерди ва булай деди:



–Бугюнлерде Супиянат Мамаеваны сизин къолугъузгъа тюшген «Сайламлы асарлары» отуз йылланы боюнда чалышып тургъан яратывчулукъ ишини бир натижасыдыр. Булай китап чыкъмакълыгъы агьамиятлы агьвалат экенлигин бизин гьар тюрлю районланы вакиллери, адабиятчылар, охувчулары, къурдашлары гелгенлик шагьатлыкъ эте. Супиянат Мамаева къумукъ поэзияда янгы адам тюгюл, ол язагъанлы отуз йыллардан да артыкъ бола. Бизин шаирлени арасында ол аз яза – асил яза дейгенлени сыдыраларына гире. Амма ону басмадан чыкъгъан китаплары аз тюгюл. Биринчи шиърулары 1984-нчю йылда чыкъгъан «Яшыл отдагъы чыкълар» деген яш шаирлени жыйым китабына гирген. Сонггъу йылларда чыкъгъан китап­ларын эсгерсек, «Сагъындым сени», «Кёпюрлер», «Мингчечек», яшлар учун язылгъан китапларындан «Ай-яй-яй», «Тюекъуш» ва башгъалары охувчуларыны юреклеринде оьзлени ерин тапгъан.



Малик Гьюсейнов Супиянат Мамаеваны яратывчулугъуну айланасында кёп маълуматлар берди ва бугюн малим этилеген янгы китап «Сайламлы асарларыны» айланасына гёчдю. Жыйынны юрютювчю гьисапда Дагъыстанны язывчуларыны союзуну председатели, Дагъыс­танны халкъ шаири Магьаммат Агьматовгъа сёз берди. Магьаммат Агьматов Супиянат Мамаеваны янгы китабы булан гьакъ юрекден къутлады. Дагъыс­танда ана тилинде китаплар чыгъармакъ, белгили шаирлени юбилейлерин оьтгермек халкъ учун кёп уллу агьвалат экенни эсгере туруп, шаирни оьз хаты, оьз къаравлары барны ва поэ­зиягъа, къумукъ адабиятгъа жавап­лы кюйде янашагъанны айтды ва ону шиърулары оьзгелеге ошамайгъаны да ону пагьмусуну бир яны экенни эсгерди.



Ондан сонг сёз берилген филология илмуланы доктору, профессор Абдулкъадир Абдуллатипов Кёстекден белгили шаирлер чыкъгъанын эсгерди ва булай деди:



–Шоланы арасында Супиянат Мамаева да – Кёстек юртну бир юлдузу, – деди.



– Супиянатны поэзиясына къарасанг, кёп инче гьисге – сюювге багъышлангъан. Супиянатны элге, халкъгъа, ватангъа, анасына багъышлангъан шиърулары да бар. Супиянат – къысгъа, тек терен маъналы шиъруланы устасы. Къысгъа буса да, олар чебер къураллар–ошатывлар, тенглешдиривлер, яшыртгъын тенглешдиривлер, къопдурувлар, жанландырывлар булан безендирилип терен маънаны топлай.



Супиянат Мамаеваны оьзтёрече хаты, оьз тавушу бар экенни эсгере туруп, Дагъыстанны халкъ шаири, Дагъыстанны язывчуларыны союзуну, къумукъ секциясыны ёлбашчысы Шейит-Ханум Алишева ону янгы китабы булан гьакъ юрекден къутлады.



Филология илмуланы кандидаты Ругьаният Мусаева шаирни поэзиясыны ва ону янгы китабыны айланасында лакъыр эте туруп, Къарабудагъгент районну вакиллерини атындан къутлады ва булай узатды:



–Супиянат Мамаева оьзюню поэзиясында сюювню оьзтёрече гёрсетме бажаргъан. Ол – инсанны инг де гючлю татывлу ва янывлу, юрекни оьр де, тёр де этеген, инсангъа бир ругь береген гьасиретлик этип суратлагъан шаирликни мекенли бир устасы. Супиянат адабиятгъа тезден берилип гелген буса да, ону сабур-саламат хасиятыны таъсиринден китапларыны санавун артдырайым деп бек гьаракат этмеген. Шаирни жан азыгъы болуп токътагъан яратывчулугъу буса ону бугюнлерде савлай тюрк дюньясына белгили болгъан. Бугюн биз Супиянат Мамаеваны «Сайламлы асарларыны» гьакъында лакъыр юрютебиз. Мунда 6 бёлюкню ичинде топлангъан ону 162 асары шаирни инг де маъналы, адамны ич дюньясына байлавлу сююв темагъа багъышлангъан.



«Сайламлы асарларыны» айланасында лакъыр этмеге шо гюн жыйылгъанлар шаирни яратывчулугъуну гьакъында кёп лакъыр этди. Алимлер Салав Алиев, Забит Акавов, Разияханум Агьматова, Дагъыстанны халкъ шаирлери Агьмат Жачаев, Багьавутдин Гьажиев ва башгъалары шаирни янгы китабы булан къутлады. Юртлардан, районлардан гелгенлер шаирни оьзюню шиъруларын, шаирге оьзюне багъышлап язгъан шиъруларын чебер кюйде охуду. Шаирни яратывчулугъундан бир нече шиъруларын Ленингентдеги 2 номерли школаны, Къарабудагъгент гимназияны ва Кёстек юрт школаны охувчулары да чебер кюйде охудулар.



Жыйынны ахырында Супиянат Мамаева бары да жыйылгъанлагъа гьакъ юрекден баракалла билдирди. Шаирни китабына багъышлангъан яратывчулукъ ахшам сююмлю йыравларыбызны йырлары ва бийивлери булан узатылды.



Супиянат Мамаеваны юбилейине байлавлу яратывчулукъ ахшамы буса октябр айны 26-сында оьтгерилежек.



Авторизация
*
*
Регистрация
*
*
*
Согласны с условиями сайта?
Генерация пароля