Савбол, школа!


Пятница, 25.05.2018г. - "ЁЛДАШ".


Республиканы охув ожакъларында ахырынчы зенг къагъылды


 


Дагъыстанны билим берив ва илму министерлигинден алынгъан маълуматлар исбатлайгъан да йимик, бу йыл бизин республикада 12 мингден артыкъ яш школаны битдирип чыкъды. Савлай уьлкеде йимик, олар учун да бу жуманы артдагъы гюнлеринде ахырынчы зенг къагъылды.

 



Гезикли охув йылны тамамлана­гъанын белгилейген шо агьвалат бютюн оьмюрюн яш наслугъа билим ва тарбия беривге багъышлагъан муаллимлер ва школаны тамамлап чыгъагъан яшёрюмлер учун айрыча таъсирли оьтдю. Неге тюгюл, шо гюн жагьил уланлар ва къызлар он бир йыл юрюп, охуп билим алгъан, биринчи герти къурдашларын тапгъан школа булан савболашып, яшав ёлуна абат алдылар.



Мердешленген кюйде, муаллимлер, оьтгерилеген шатлы байрамларда ортакъчылыкъ этген кёп санавдагъы къонакълар, ата-анасы охувчу яшланы къутлап сёйледилер. Орта школаны битдирип чыгъагъанлар да оьз гезигинде сююмлю муаллимлерине, оьзлени класдан-класгъа алып юрюген ёлбашчыларына баракалласын билдирди. Олагъа яхшы савлукъ, узакъ оьмюр, гьар гюнлюк чалышывунда оьрлюклер ёрап, разилик сёзлер айтдылар.



Яшланы школа булан савболлашыв байрамы кюр йырлар ва къурч бийивлер булан давам этилди. Адатлы кюйде школаны битдирип чыгъагъан яшлар къызыл лентлерине бир-бирине насигьатлы ёравларын яздылар.



Биз де бу йыл школаны тамамлап чыгъагъан уланланы ва къызланы къутлап, олагъа ювукъда оьтгерилежек бирикген пачалыкъ экзаменлени оьр къыйматлагъа берип, юрегине тутгъан бары да муратлагъа етишмекни ёрайбыз. Яшавну оьрю де, эниши де, къыйыны да, тынчы да бар. Школада алгъан билимлеригизни, муаллимлеригиз берген насигьатланы къоллап, юрек авагъан касбуну да танглап, савлукъ булан лайыкълы кюйде яшамагъа сизге насип болсун!!!  




Авторизация
*
*
Регистрация
*
*
*
Согласны с условиями сайта?
Генерация пароля