Сёйлешивлер пайдалы оьтген


Кремлде Россияны Башчысыны Россиягъа иш сапары булан гелген Тюркия Республиканы Президенти Режеп Тайип Эрдогъан булан сёйлешивлери болгъан. Сёйлешивлени барышында Владимир Путин ва Режеп Тайип Эрдогъан сатыв-алыв ва саният масъалаланы арагъа салып ойлашгъан. Пачалыкъланы башчыларыны сёйлешивлери уьч сагьат юрюлген. Бир башлап оланы экевюню де бетге-бет лакъы­ры болгъан. Ондан сонг сёйлешивлеге делегациялар да къуршалгъан.



«Бугюн бизин сёйлешивлер, Россияны ва Тюркияны арасында мердешленген кюйде, пайдалы юрюлдю, – деген, сёйлешивлени натижасын чыгъара туруп, Владимир Путин. – Аслу агьамият экономика масъалалагъа ва гуманитар байлавлукъгъа берилди. Озокъда, Сириядагъы гьалны гьакъында да мекенли кюйде лакъыр юрюлдю. Сирияны территориясындан террор группаланы ёкъ этмек деген ва Идлиб районундагъы гьалны ёрукълашдырмакъ деген масъалалагъа аслу тергев берилген.



Айрыча алгъанда, Идлибде савутсуз зона къурмакъ деген Россия-Тюркия меморандум арагъа салынып ойлашылды, – деп билдирген Владимир Путин. – Россия ва Тюркия Идлиб районундагъы гьалны ёрукълашдырма болагъан ёллар ахтарылды».



Россияны ва Тюркияны Башчылары эки де пачалыкъны экономика масъалаларына, сатыв-алыв ва гуманитар-маданият аралыкъларына да агьамият берген. «Россия – Тюркиягъа баргъан туристлени санавуна байлавлу биринчи ерде, – деп билдирген Владимир Путин. – 2018-нчи йылда Тюркияны курортларында 6 миллионгъа ювукъ турист ял алгъан», – деп билдирген Россияны Президенти.



Эрдогъан оьзюню гезигинде билдиргени йимик, 2018-нчи йылда ону Владимир Путин булан дёрт керен ёлугъувлары болгъан. Бугюнгю ёлугъув буса – 2019-нчу йылда биринчи керен. «Гертиден де, кёбюсю тармакъларда: маданият, сатыв-алыв, военный тармакълардагъы гьаллар бизин аралыкъланы оьсю­вю булан байлавлу», – деген Р. Эрдогъан.





Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля