Шагьатнамалар тапшурулду


Алдагъы гюнлерде Россияны полициясыны 300 йыллыкъ юбилейини дазуларында, Дагъыстан Республиканы ич ишлер министри, полицияны генерал-лейтенанты Абдурашит Магьамматов МВД-ни тармагъына гиреген оьр охув ожакъланы битдирген жагьиллеге къуллугъуна байлавлу шагьатнамалар тапшурду.



Шо гюн шагьатнамалар кимге де берилип къалмады. Айтагъаным, шонда жыйылгъан жагьиллер Россияны гьар ерлеринде оьр охув ожакъланы яхшы къыйматлагъа битдирген, 5 йылны узагъында оьзлени адилли кюйде гёрсетгенлер эди. Ондан къайры да, яш наслуну арасында оьзлени къуллугъун кютегенде жан берген полиция къуллукъчуланы яшлары да бар эди.



Шагьатнамалар тапшурулгъан яш офицерлер Дагъыстанны МВД-сини гьар ерлердеги бёлюклеринде ишлеге къуршалгъанлар. Бу агьвалатда МВД-ни министри Абдурашит Магьамматов бары да мелте йимик жагьил офицерлени къутлай туруп, оьзюню сёйлевюн шулай башлады:



–Сиз танглагъан касбу бек жаваплы экенни яхшы англайсыздыр. Парахатлыкъда яшайбыз деп тура­гъанда, яшавда нече тюрлю къайгъылы агьвалатлар болуп гете. Артдагъы йылланы ичинде бизин МВД-ни 16 къуллукъчусу «Россияны Игити» деген атны къазангъан. Умуми санавлар булан айтсакъ, бизин 18 Игитибиз бар. Оланы экевю Уллу Ватан давну ортакъчысы да дюр. Шо да кёп затны англата, МВД-ни къуллукъчуларыны ишине багьа бере.



Бизге ишге тюшмек де–кёп уллу намус. Сиз барыгъыз да бизин тармакъгъа гиреген айтылынгъан оьр охув ожакъланы тамамлагъансыз. Шо охув ожакъланы битдирип, намуслу кюйде ишлейгенлер бизин арабызда да бар. МВД олагъа инамлы кюйде аркъа таяй. Сиз бизин тарихибизде оьтесиз агьамиятлы касбуну танглагъансыз. Шогъар бир де шеклик этмеймен. Шолай болмагъан буса, савлай дюньягъа белгили режиссёрлар, актёрлар полиция къуллукъчуланы, оланы яшаву, иши гьакъда фильмлер чыгъармас эди.



Бу ишде гьар гюн янгы адамлар булан, янгы масъалалагъа, четимлик­леге ёлукъма тюше. Ондан къайры да, сиз сюйген заманда эркин кюйде тыш пачалыкълагъа чыгъып гетме, гечеги клубларда, гьар ерлерде негьакъ бош заманыгъызны йиберме болмажакъсыз. Ишигизге гиришип битгенче, сизге бары да янларын оьлчеп къарамагъа, ойлашмагъа тарыкъ.



Мен сизге оьрде де бизин МВД-де кёп сав-саламатлы къуллукъчулар ишлейгенни гьакъында эсгердим. Тек нечакъы да арабызда ашгьарамлар да, пайдасыз тайпа да болгъан. Шолай адамланы ёлуна тюшерден сакъ болугъуз. Олай адамлагъа бизин сыдырабызда ер болмажакъны билигиз. Неге тюгюл, бизин Дагъыстанда 3 миллиондан да артыкъ адам яшай. Оланы эсен-аманлыгъы сизден гьасил болажакъ. Шону учун сиз законгъа гёре, жаваплылыкъны гьис этип, ишигизни тийишли кюйде, низамны бузмай кютме герексиз. Сизин кёплеригиз ата-анагъызны ёлун тутгъан. Оланы да, бизин пачалыгъыбызны да ер этмегиз,–деди министр.



Ондан сонг ата-аналаны атындан агьлюсю МВД-де къуллугъун кютюп, жанын къурбан этген полиция къуллукъчуну тул къалгъан къатыны Райисат Исаева оьзюню сёйлевюнде булай эсгерди:



–Мени уланым атасыны къыйынлы касбусун танглагъаны учун, озокъда, оьктем боламан. Ол таза ва гьалал кюйде, атасын ер этмей ону ёлун узатажакъгъа инанаман. Барыгъызгъа да яхшылыкълар ёрайман.



Сёйлевлени ахырында министр офицерлени барына да бир ягъадан шагьатнамаланы тапшурду.



Авторизация
*
*
Регистрация
*
*
*
Согласны с условиями сайта?
Генерация пароля