Операны ва балетни театры – Къоркъмаскъалада

   

Пятница, 27.04.2018г. — «ЁЛДАШ».


Оьтген жумада Дагъыстанны операсыны ва балетини театрыны солистлери Хумторкъали районну Къоркъмаскъала юртунда болуп концерт программасын гёрсетди. Бу концерт ДР-ни маданият министерлигини проектине гёре юрюлдю.


 


Коллективге ДР-ни маданиятыны ат къазангъан къуллукъчусу, театрны режиссёру Николай Бабичев ёлбашчылыкъ этди. Ону кёмекчилери болуп ДР-ни инчесаниятыны ат къазангъан чалышывчусу Валерий Шаулов ва ДР-ни халкъ художниги Ибрагьимхалил Супьянов да бар эди. Концертде Хумторкъали районну башчысыны къуллугъун заманлыкъгъа кютеген Райисат Рамазанова ва районну маданият управлениесини начальниги Мадинат Къанаматова да ортакъчылыкъ этди.



Оьзлени концерт программасы булан театрны белгили артистлери, ДР-ни халкъ артисти Мухсин Камалов, ДР-ни ат къазангъан артистлери Абакар Омаргьажиев, Абдурашит Зиявутдинов, Бурлият Абдуллаева да пагьмуларын гёрсетди.



9 Май байрамны алдында артистлер дав йылланы йырларын да йырлады. Къаравчулар «Смуглянка» деген йырны, Ягьия Исакъов ва Зайира Дайибова йырлагъан «Эхо любви» деген йырны бек ушатды ва гючлю харс урувлар булан къаршылады.



Концерт битген сонг болгъан «дёгерек столда» маданият варислигибизни, фольклорну сакълавгъа, къаравчуланы белгили спектакллеге къуршавгъа байлавлу масъалаланы арагъа салып ойлашывда пайдалы лакъыр болду. Райондагъы яшланы инчесаният школасы да шо ёрукъда пайдалы иш этегени эсгерилди.


 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля