Маданият варислигибизге якълав тарыкъ


Сентябр айны 20-сында Магьачкъаладагъы милли китапханада Дагъыстанны маданият варислигин къоруп сакълайгъан агентлиги жыйын оьтгерди. Шонда ДР-ни Гьукуматыны Председателини биринчи заместители А.Карибов,Темиркъазыкъ ва Гюнтувуш федерал округда РФ-ни маданият министерлигини управлениесини ёлбашчысыны заместители А. Уьзденова, оьзге министерликлени ва ерли гьакимликлени вакиллери ортакъчылыкъ этди.



ДР-ни маданият варислигин къоруп сакълавну агентлигини ёлбашчысы З.Къагьриманов берген маълуматгъа гёре республикада сакъланагъан 6354 объект бар. Шолардан 1994-сю – федерал оьлчевдеги варисликлер, къалгъаны – республика оьлчевде.



Савлай Россияны оьлчевюнде алгъанда, къоруп сакъланагъан объек­тлени санавуна гёре Дагъыстан – бешинчи ерде. Агентликни къуллукъчулары жаваплы ва агьамиятлы ишни бойнуна алгъан, тек иш юрютювде харж етишмейгени четимликлер тувдура.



Районларда ва юртларда къоруп сакъланагъан эсделиклени дазусуна къарамай, ерли адамлар уьйлер къурмакъ, бав-бахча этмек учун ерлени тутагъан гезиклер кёп болгъан. Ондан къайры да, къоруп сакъланагъан объектлени санавуна гийирилген эсги межитлени бир-бир юртларда оьзлер ярашдырабыз деп бузагъан гезиклер де къаршы бола. Шолай кемчиликлени алдын алмакъ учун агентликни къуллукъчулары районларда ва юртларда бола, англатыв ишлени юрюте, кемчиликлени алдын алма къаст эте.



А.Карибов оьзюню сёйлевюнде маданият варисликни сакълавда дюнья оьлчевде юрюлеген къайдаланы къолламакъны, гьар эсделикге генг кюйде ону гьакъында маълумат язып салмакъны агьамиятлыгъын эсгерди.



Жыйында ДР-ни Халкъ Жыйыныны депутаты, билимге, илмугъа, маданиятгъа, спортгъа, туризмге къарайгъан комитетни председатели М.Къурбанов, Дагъыстан илму центр­ны баш илму къуллукъчусу, профессор М.Гьажиев, агентликни бёлюгюню ёлбашчысы Н.Аллаев ва оьзгелер республикабызны байлыгъы гьисапда маданият варисликни якълама ва къоруп сакълама герекни гьакъында, алда токътагъан масъалаланы гьакъында айтды.



Авторизация
*
*
Регистрация
*
*
*
Согласны с условиями сайта?
Генерация пароля