Адиллик уьстюн гелди


Декабр айны 2-синде Бахтияр Агьматовгъа тутушуп ябушувда 2008-нчи йылгъы Олимпиаданы алтын медалы тапшурулгъан. О савгъат огъар алтын медаль къазангъан Артур Таймазов Олимпиадада допинг къоллагъаны белгили болгъан сонг берилген.



Бахтияргъа алтын медаль Москвада, «Динамо» комплекс­де, Иван Ярыгинни атындагъы халкъара турнири оьтеген ерде берилген.



«Бу мени яшавумда белгили гюн, – деген Б.Агьматов, – мени якълагъанлагъа баракалла билдирмеге сюемен. Спорт ярышлар къаравчулар учун юрюле. Бугюн мени якълама гелгенлеге, тренериме баракалла билдирмеге сюемен. «Билмеймен, сени эсингдеми, – деди ол атасын сагьнагъа чакъырып, – магъа Олимпиаданы чемпиону болма сюемисен дегенинг. Мен сагъа сюемен деп айтдым. Мен сагъа Олимпиаданы медалы муна гьали де сени тёшюнгню безегенни сюемен», – деп, ол медалын атасына тапшура.



Агьматов айтгъан кюйде, Пекинде огъар гюмюш медалын тапшургъан. Тек къазангъан гюмюш медальны 10 йылны узагъында къолуна да алма­гъан. Муна гьали халкъара Олимпиада комитетге йиберген. «Касбучулар олай да биле, о мени медалым тюгюл экенни. Судьяланы «яхшылыгъындан» берилген эди. Гьали мени алтын медалым бар, огъар мен башгъачалай янашажакъман», – деген Олимпиаданы янгы чемпиону.



Олимпиаданы чемпионуна берилежек акъчаны къаравуллаймысан деген соравгъа, ол: «Магъа Олимпиаданы акъчасы тюгюл, алтыны тарыкъ эди», – деген.



 

Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля