Гьаракатчы къыз


Юрт школаланы яхшы къыйматлагъа битдирген сонг, бизин республикадан тышдагъы оьр охув ожакълагъа тюшюп, оларда да уьлгюлю кюйде охуйгъан, оьзлер булан оьктем болмагъа ярайгъан кёп студентлер бар экени сююнчюбюзге ёл ача, гележекге инамлыкъ тувдура. Шо гьакъда айта туруп, Къарабудагъгент юртда тувуп оьсген, бугюнлерде буса Саратов пачалыкъ юридический академияны уьчюнчю курсунда охуп турагъан Минара Гьажиеваны гьаракаты гьакъында айрыча эсгермеге ярай.



Неге тюгюл, къарабудагъгентли Манап ва Субайбат Гьажиевлеге къызы Минара охуйгъан академияны ёлбашчыларыны атындан билимли ва тарбиялы къызны оьсдюргени саялы бир нече керенлер баракалла кагъызлар гелген.



Минара Гьажиева Россияда юристлени гюнюнде студентлени арасында янгы асруда бизин уьлкеде законлар чыгъарывгъа байлавлу оьтгерилген илму-ахтарыв къаравда биринчи ерни алгъан ва диплом булан савгъатлангъан. Шондан къайры да, эсгерилген оьр охув ожакъда гьалиги шартларда айлана якъны къоруп сакълав масъаласына яшланы ва яшёрюмлени янашывуна багъышлангъан илму-ахтарыв ишине яхшы къыймат берилип, экинчи ерни алгъанын гертилейген грамота тапшурулгъан.



Шону булан бирге, огъар сув байлыкъланы асувлу къоллавну масъалаларына байлавлу «дёгерек столда» жагьлы кюйде ортакъчылыкъ этгенин исбатлайгъан шагьатнама берилген. Шолайлыкъда, Минара Гьажиева охувда етишген уьстюнлюклери, оьр охув ожакъда ва ондан тышда да оьтгерилеген ишлерде де жагьлы кюйде ортакъчылыкъ этегени гьисапгъа алынып, ол Астрахан областны губернатору Александр Жилкинни стипендиясына лайыкълы болгъан.



Биз де Минарагъа гележекде дагъы да уллу уьстюнлюклеге етишмекни ёрайбыз. Шу кюйде гьаракат этеген студентлер булан оьктем болабыз, олай да бары да яшёрюмлеге оьр охув ожакъларда яхшы билимлер алмакъ учун къасткъылып гьаракат этеген оьзлени тенглилеринден уьлгю алмакъны насигьат этебиз.



 

Нюрсагьадат Изамутдинова.


Къарабудагъгент юрт.
  Суратда: М. Гьажиева Аштархан областны губернатору


А. Жилкин булан.

Авторизация
*
*
Регистрация
*
*
*
Согласны с условиями сайта?
Генерация пароля