Эсделикни ва къайгъыны гюню


Пятница, 22.06.2018г. — «ЁЛДАШ».


1941-нчи йылны 22-нчи июну – Россияны тарихинде инг де къайгъылы гюнлени бириси, экинчи дюнья дав – Уллу Ватан дав башлангъан гюн гьисаплана.

 



Июн айны 22-синде 1941-нчи йыл фашист Германия хапарсыздан Совет Союзгъа чапгъын эте. Душманны авиациясы 250–300 чакъырым ердеги бизин аэродромлагъа, темир ёл станциялагъа, асгер бёлюклеге, дав-денгиз базалагъа атышып башлай. Шо замангъа фашист Германияны яны болуп, Румыния, Италия, бираз заман гетип, Словакия, Финляндия, Венгрия, Норвегия дав гьаракатгъа къуршала.



Совет Союзну халкъы къанын-жанын аямай Ватанны душмандан якълап башлай. Къайгъылы, къанлы 1418 гюн юрюлген дав 1945-нчи йылны 9-нчу майында фашист асгерлени толу кюйде тюп болуву булан тамамлана.



СССР дав йылларда тас этген халкъны санаву 26,6 миллионгъа тенг геле. Олар – Брестден Сталинградгъа етишгинче дав майданда къырылгъан, госпиталларда яралардан, фашист елевчюлени къолундан оьлгенлер.



1992-нчи йыл болгъунча Ватан дав башлангъан гюн хас кюйде, Ватанны якълавчусуну эсделик гюню гьисапда белгиленмеген. 1996-нчы йыл 8-нчи июнда буса 22-нчи июн – Эсделикни ва къайгъыны гюню деп билдиреген указгъа Россияны Президенти къол салгъан.



Россияны территориясындагъы бары да ерлерде 22-нчи июн Ватан дав башлангъан къайгъылы гюн гьисапда белгилене. Телевидениеде, радиода, маданият ожакъларда адамны гёнгюн алагъан, шатлы чаралар оьтгерилмей. Уьлкени ёлбашчылары шо гюн Москвада «Белгисиз солдатны» къабуруна гюллер сала. Халкъ Ватан дав башлангъан гюнню минутлукъ шыплыкъ булан эсге ала.



Ватан дав башлангъан гюнню алдында «Эсделикни поезди» деген яшёрюмлени агьвалаты оьтгериле. Брест къаланы майданында «Шо игитликни йылларына башыбызны иейик» деген «Эсделикни поезди» булан гьар йыл Москвадан ва Санкт-Петербургдан яшёрюмлер Брестге геле. Гьар йыл яшёрюмлер Буг оьзенге Даимлик янгъан отда майчыракълар салып, «Эсделикни вахтасы» деген чараны оьтгерелер.



Янгыз Россияда тюгюл, башгъа тыш пачалыкъларда да оьтгерилеген «Даимлик полк» деген агьвалат янгыз къайгъы ва эсделик болуп къалмай, Ватан учун гетген наслу гёрсетген къоччакълыкъны шагьаты да дюр. Ону булан оьктем болабыз.



«Эсделикни майчырагъы» деген чара Дагъыстанны шагьарларында ва районларында да оьтгериле. Ленинни комсомолу деген паркда шолай агьвалат гьар йыл сайын бола. Онда аслу гьалда яшёрюмлер ортакъчылыкъ эте.



Авторизация
*
*
Регистрация
*
*
*
Согласны с условиями сайта?
Генерация пароля