Депутатлар яшланы больницаларында болгъан


Дагъыстангъа сапары булан гелген Пачалыкъ Думаны савлукъ сакълав масъалалагъа къарайгъан комитетни депутатлары башында ону председатели Дмитрий Морозов булан Магьачкъаладагъы эки уллу медицина идарагъа баргъан. Къонакълар яшланы республика клиника больницасыны иши булан таныш болгъан. Олар больницаны тыш янындан ва ичинден айланып, операция, реанимация бёлюклерин тергеп чыкъгъан ва медицина къуллукъчулары булан лакъыр этген.


 


Москвадан гелген къонакъланы Дагъыстанны Гьукуматыны Председателини биринчи заместители Анатолий Карибов, республиканы савлукъ сакълав министри Жамалутдин Гьажиибрагьимов, савлукъ сакълавну къуллукъчуларыны профсоюзуну председатели Зумурут Бучаева алып айлангъан.



Ондан сонг Пачалыкъ Думаны савлукъ сакълавгъа къарайгъан комитетини председатели Дмитрий Морозов янгы перенатальный центрны актовый залында медицина къуллукъчулар учун «Детская хирургия в вопросах права» деген темагъа гёре лекция охугъан. Маъналы ва къужурлу доклад шонда ортакъчылыкъ этгенлени тергевюн тартгъандан къайры, оланы бек иштагьландыргъан. Айтагъаным, лекциядан сонг Дмитрий Морозовгъа соравлар берме башлагъанда, эки де якъны арасындагъы лакъыр жанлы кюйде оьтген. Дмитрий Морозов оьзюню ойларын айта туруп, медицина учреждениелени ишине оьр багьа берген.



– Биз баргъан ерлердеги коллективлер мени тамашагъа къалдырды. Шоларда оьз ишин яхшы билеген, къыйынлы борч­ларын намуслу кюйде кютеген касбучулар чалыша. Айрокъда яшланы республика клиника больницасыны реанимация бёлюгюндегилеге рази къалдым. Шону учун олагъа кёмек этмеге герек. Биринчилей, олагъа не етишмейгенни, не тарыкъ экенни токъташдырма тюшежек. Ёлугъувну вакътисинде арагъа чыкъгъан масъалаланы уьстюнде ишлеп, сонг кёмек этежекбиз. Биз мунда шону учун гелгенбиз,–деген Дмитрий Морозов.



Сонг олар Дагъыстан пачалыкъ медицина университетге баргъанлар. Шонда депутатлагъа медицина тармакъ учун касбучуланы гьазирлейген къайдаларын хабарлагъанлар ва гёрсетгенлер. Бу оьр охув ожакъны студентлери хас манекенлерде аврувлагъа медицина кёмекни нечик этме тарыкъны гёрсетгенлер. Олар роботланы къоллап, искусственный тыныш, юрегине тюз къайдада массаж этеген, къан тёгювню токътатагъан кюйлерин гёрсетгенлер.



Ёлугъувлардан сонг Пачалыкъ Думаны савлукъ сакълав комитети Дагъыстанны савлукъ сакълав министри Жамалутдин Гьажиибрагьимовгъа, Дагъыс­тан пачалыкъ медицина университетни ректору Сулейман Маммаевге ва онда ишлейген касбучулагъа савгъатлар тапшургъан.



Авторизация
*
*
Регистрация
*
*
*
Согласны с условиями сайта?
Генерация пароля