Дагъыстанны парламентини гезикли сессиясы оьтгерилген


   Сессияны Дагъыстанны Халкъ Жыйыныны Председатели Хизри Шихсайитов ачгъан ва юрютген. Ону ишинде Дагъыстан Республиканы Башчысы Владимир Васильев, Пачалыкъ Думаны ва иш юрютювчю къурумланы, ерли гьакимлик къурумланы, тергев иш юрютеген къурумланы, жамият ва дин къурумланы, маълумат къуралланы вакиллери де ортакъчылыкъ этген.



Бир башлап Хизри Шихса­йитов «Лидеры России» деген конкурсну финалына чыкъгъан дагъыстанлыланы къутлагъан. Оланы арасында Халкъ Жыйыныны депутаты Зумрут Бучаева да бар. Парламентни спикери Бучаеваны къутлагъан ва огъар конкурсну финалында уьстюнлюклер ёрагъан.



Сессия партияланы вакиллери арагъа салагъан бугюнгю жамиятны аслу масъалалары булан башлангъан. КПРФ-ден Магьмут Магьмутов экономикагъа, «Справедливая Россия» партиядан депутат Магьамматхан Арацилов регионда туризмни гётеривге, «Единая Россиядан» Висампаша Ханалиев савлукъ сакълавгъа байлавлу агьамиятлы масъалаланы гётерген.



Владимир Васильев гётерилген масъалалагъа гёре оьзюню къаравларын англатгъан.



Сонг депутатлар Дагъыстан Республиканы судьяларыны коллегиясына жамият вакиллени айыргъан. Бир-бир суд участкалагъа белгиленеген ярашывлукъ судьяланы оьтгермеге де тавуш берген.



Экинчилей охувда «Дагъыс­тан Республиканы референдиумуну гьакъындагъы» Дагъыстан Республиканы Законуна алышынывлар къабул этилген.



Сонг, «Дагъыстан Республикада топуракъ масъалаланы ёрукълашдырывуну», «Дагъыстан Республиканы кёп къабатлыкъ уьйлеринде уллу ремонт этивню» гьакъындагъы закон проектлени де депутатлар къабул этмеге тавуш берген.



Биринчи охувда «Дагъыстан Республиканы пачалыкъ ватандаш къуллугъуну гьакъындагъы», «Дагъыстан Республикада муниципал къуллукъну гьа­къындагъы» закон проектлеге де къаралгъан. Дагъы да биринчи охувда депутатлар «Дагъыстан Республикада автомобиль ва электрик транспорт булан пассажирлени юрюшюню тийишли къайдаларыны гьакъындагъы» закон проектни де къабул этген.



Республиканы ёлбашчысы шо ёрукъда мекенли иш этилежегин эсгерген ва депутатланы да шо ишге гиришме герегин айтгъан. Хизри Шихсайитов шо масъалалагъа гёре депутат корпусдан тындырыкълы янашыв болажа­гъын айтгъан.



Шондан сонг тийишли тюзелтивлер ва алышынывлар этилип, биринчи охувда къабул этилген «Дагъыстан Республикада физкультураны ва спортну гьакъында», «Дагъыстан Республикада гьакъылбалыкъ болмагъан яшланы ишлерине къарайгъан ва оланы ихтиярларын якълайгъан комиссияланы гьакъында» ДР-ни законланы проектлерине къаралгъан. Биринчи законну проектинде физкультура ва спорт тармакъгъа гёрсетилеген акъча маяланы гесимин белгилевде регионну гьакимлик къурумларыны ихтиярларын, олай да хас кюйде оьтгерилеген спортгъа ва физкультурагъа байлавлу ярышлагъа харж гёрсетивню ёругъу тасдыкъ этиле. Бизин республиканы прокуратурасы малим этген кюйде, оьрде эсгерилеген экинчи законну проектинде гьакъылбалыкъ болмагъан яшланы ишлерине къарайгъан ва оланы ихтиярларын якълайгъан комиссиялагъа шо чагъындагъы яшланы арасында иш гёреген оьзге муниципал гьакимлик къурумлар булан байлавлукъ тутуп иш гёрмеге таклиф этиле. Ону арагъа салып ойлашагъан вакътини ичинде эсгерилгени йимик, шо закон гьакъылбалыкъ болмагъан яшланы тергевсюз къалывдан къорумакъны ва оланы арасында жинаятчы ишлени алдын алывну гёз алгъа тута.



Бизин республиканы Прокуратурасы бирдагъы да «Дагъыстан Республикада гьавайын этилеген юрист кёмекни гьакъындагъы» законуну 9-нчу статьясыны 1-нчи бёлюгюне алмашынывлар этивге байлавлу законну проектин малим этген. Эсгерилген шо законну 
проектине гёре гьавайын юрист кёмек алмагъа болагъан ватандашланы къатлавларын толумлашдырмагъа гёз алгъа тутула.



Демек, гьавайын юрист кёмекге кёп къабатлы уьйлени къурувгъа акъча маялар берип алдангъанлар да лайыкълы экени токъташдырыла. Шо да бугюнлерде бизин республикада кёп къабатлы уьйлени къурувда тувулунгъан гьал булан байлавлу этиле. Шо законну проектин депутатлар якълай ва биринчи охувда къабул эте.



Шондан къайры да, сессияда биринчи охувда «Дагъыстан Республикада промышленностну масъалаларыны гьакъында», «Дагъыстан Республикада яшайгъанланы кёкюрек аврувуну алдын алывгъа байлавлу кёмек болдурув ва Дагъыстан Респуб­ликада кёкюрек аврувну яйылывуну алдын алывну гьакъында», олай да «Жамиятны янындан экологиягъа тергев этивню гьа­къында» ДР-ни законлары къабул этилген. Эсгерилген законлагъа алмашынывлар шоланы Федерал законлар булан къыйышдырмакъ учун этилген.



Бизин республиканы пар­ламентини сессиясыны бары­шында дагъы да бир нече масъалалар арагъа салынгъан. Шоланы биринчиси – «Дагъыстан Республикада халкъны китапхана къуллукъларын кютювню гьа­къындагъы» Дагъыстан Республиканы Законуну 21-нчи статьясына алмашынывлар этивге байлавлу законну проекти. «Дагъыстан Рес­публиканы Халкъ Жыйыныны янында иш гёреген Жагьиллени парламентине гирегенлеге байлавлу алмашынывлар этив», олай да «Дагъыстан Республиканы Халкъ Жыйыныны иш низамыны 35.2 статьясына алмашынывлар этив» деген законланы проектлерине де къаралгъан. Шону булан бирге эсгерилген законлагъа этилген тюзелтивлер ва алмашынывлар да тасдыкъ этилген.



Шолай да, депутатлар бир нече депутатланы болжалдан алда ихтиярларын токътатывгъа байлавлу тавуш берген. Сессияда «Гьукумат сагьатыны» оьлчевюнде «Дагъыстан Респуб­ликада 2018-нчи йылда кёп къабатлы уьйлерде ортакъ мюлкню ярашдырывну ва янгыртывну гьакъындагъы» программаны яшавгъа чыгъыву арагъа салынып ойлашылгъан.



Авторизация
*
*
Регистрация
*
*
*
Согласны с условиями сайта?
Генерация пароля