Дагъыстанны Гьукуматыны генгешинден


   Январ айны 30-нда Артём Зду­новну ортакъчылыгъы булан Дагъыстанны Гьукуматыны ге­нгеши оьтгерилген. Онда иш юрютюв чыгъарагъан къурумлары ва оьз ишин оьзлер кютеген муниципал къурулувлары булангъы РФ-ни ва ДР-ни милли пачалыкъ политика масъа­лалары арагъа салынып ойлашылгъан.



Шо темагъа доклад ДР-ни милли политикагъа ва дин ишлерине къарайгъан министри Татьяна Гамалей этген. Ол айтгъан кюйде, биринчилей, муниципал къурулувларыны РФ-ни милли политикагъа байлавлу пачалыкъ стратегиясын ДР-де яшавгъа чыгъарывуну масъаласы арагъа чыгъа.



«Гьакимликни муниципал къурумларыны, бары да муниципал къурумлар булангъы 2013–2014-нчю йылларда рес­публикадагъы милли аралыкъланы оьсювю ва бек­лешивю гьакъындагъы рази­лешивге къоллар салынгъан. Шо разилешивге байлавлу 29 муниципал къурулувда ва шагьар округларда муниципал программалар къурулгъан, 23-нде буса миллиара ярашывну ва разилешивню планы яшавгъа чыгъарыла», – деген Татьяна Гамалей.



Олай да, министр РФ-ни милли стратегиясына байлавлу пачалыкъ программасын яшавгъа чыгъарагъан асувлу ёлланы гьакъында да айтгъан. «Муниципал къурумларыны ёлбашчыларына багьа берилме гереклиги муниципал программаланы яда планланы берилгенлигинден, милли аралыкълагъа къарайгъан советни жаваплыгъындан, олай да Россияны ватандаш бирлигин беклешдиреген ва Россияны халкъларыны этнокультура оьсювюнден ва башгъаларындан гьасил болагъан республика чаралардан гьасил бола».



Артём Здунов министрни сёйлевюне багьа бере туруп, агьамиятлы масъалаланы уьстюнде ишлеме герекни гьакъында айтгъан. «Биз гьали сизин ишигизни натижаларыны гьакъында эшитдик, амма уьстюнлю чечилмеген масъалалагъа да тергев берме тюше. Гьукуматны генгеши янгыз яшавгъа чыкъгъан маълуматланы бермек булан тамамланып къалмай. Сиз масъаланы гётерме, биз барыбыз да буса бирликде натижа, къарар чыгъарма герекбиз», – деген ол.


Генгешде Дагъыстанны маданият министри Зарема Бутаева да сёйлеген. Ол айтгъан кюйде, о ишде имканлыкъланы генглешдирив ва тарих, маданият бирликге элтеген агьамиятлы масъалаланы бириси гьисаплана.



Оьзю ишлейген тармакъдагъы масъалаланы гьакъында ДР-ни байлавлукъ, маълумат ва коммуникация министри Сергей Снегирёв да айтгъан.



Гьукуматны генгешинде олай да сатыв-алыв аралыкълар булан байлавлу Дагъыс­тан Республиканы 2018-нчи йылгъы генгешинде болгъан масъалалар ва 2019-нчу йылгъа белгиленеген масъалалар арагъа салынып ойлашынгъан.



Докладчыланы сёйлевлерини гьакъында айта туруп, Дагъыстанны Гьукуматыны башчысы сатыв-алыв тармакъны касбучуларыны билимин артдырмакъ деген масъаланы гётерген.



Генгешде Дагъыстанны Гьукуматыны Председателини биринчи заместители Гьажимагьаммат Гьюсейнов, финанс ишлеге къарайгъан министр Юнус Саадуев ва башгъалар да ортакъчылыкъ этген.



Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля