Алдагъы гюнлерде Дагъыстан Республиканы Башчысы Владимир Васильев «Кванториум» деген технопаркда пагьмулу яшлар булан ёлукъгъан. Ёлугъувда Бютюнроссия ва Бютюндюнья олимпиадаларда, конкурсларда биринчи ва савгъатлы ерлени алгъан охувчу яшлар ортакъчылыкъ этген. Шолай да, ёлугъувда ДР-ни Гьукуматыны председателини заместители, ДР-ни билим беривге ва илмугъа къарайгъан министри Уммупазил Омарова, печатны ва байлавлукъ министри Сергей Снегирёв, «Кванториум» деген технопаркны ёлбашчысы Марат Алиев ортакъчылыкъ этген.
Ёлугъувну барышында республиканы Башчысы яшлар учун этилген онгайлыкълар булан таныш болгъан ва охувчулар булан къатнагъан. Оьзлени гезигинде охувчулар Владимир Васильевни соравларына жаваплар къайтара туруп, оьзлени проектлерини гьакъында англатыв берген, башгъа ишлерин гёрсетген.
Владимир Васильев охувчу яшлагъа булай деген:
–Сизин янашывугъуз ва етишген уьстюнлюклеригиз, янгыз яшлар учун уьлгю болуп къалмай, бизге, уллулагъа да уьлгю. Сиз билимлени, сыналгъан гьакъыкъатны ёлуна тюшгенсиз. Мен сизге гьакъ юрекден уьстюнлюклер ёрамагъа сюемен, сиз этеген иш янгыз сизин байлыгъыгъыз болуп къалмай. Бу ёл булан барагъан жамият бары да якълардан генглешген, беклешген ва адилли ёлну танглагъан. Дагъыстан – бек гёзел республика, ону башгъа регионлардан эсе яхшы этмек учун къасткъылмагъа герекбиз. Биз сизге аркъатаяйбыз, сизин уьстюнлюклеригиз бизге агьамиятлы ва аявлу. Сиз этеген ишлеригиз учун сизге ва ата-аналарыгъызгъа уллу баракалла ва разилик билдиремен. Бир заманда да уллуланы да унутмагъыз.
В.Васильев охувчу яшланы соравларына да жаваплар берген. Ёлугъувну ахырында Владимир Васильев охувчулагъа етишген уьстюнлюклери учун савгъат гьисапда баракалла кагъызлар ва Янгы йылны савгъатларын – планшетлер тапшургъан.
