Бугюнлерде Дагъыстанны бырынгъы Дербент шагьарында «Пальмира» деген киноБфильмни уьстюнде ишлеп тура. Эсгерилген фильмни гесеклерин чыгъармагъа бу йылны ноябр айында Дагъыстанны Кахобросо юртунда ноябр айны 12-синде башлангъан. Proline Film деген киностудияны къаравуна гёре Дагъыстанда кинофильмни чыгъарагъан ерлер янгыз Дагъыстанда Сирияда юрюлген агьвалатланы гьакъыкъатгъа къыйышагъан кюйде гёрсетме бажарыла.
«Пальмира» деген фильм Россия Федерацияны маданият министерлигини якълаву булан чыгъарыла. Кинофильмни продюссери Андрей Сигле буса Proline Film киностудияны кюрчюсюн салгъан.
Андрей Сигле янгыз Россияда чыгъарылагъан киноланы уьстюнде ишлегенден къайры да, халкъара кино проектлерде де ортакъчылыкъ этген. Россиядагъы белгили режиссёрлар булан бирликде чалыша. «Пальмираны» режиссёру ва сценарийни язгъанлардан бири Иван Болотников – бир нече халкъара савгъатланы лауреаты. Сценарийни язгъан Константин Лопушанский «Гадкие лебеди», «Роль» ва башгъа белгили кинолагъа да сценарийлер язгъан. Халкъара кинофестивалларда савгъатлы ерлени къазангъан.
Алдагъы гюнлерде «Пальмираны» гесеклери чыгъарылагъан ерге барып Дагъыстан прессаны вакиллерине кинофильмде артистлер ойнайгъан кюйню гёрмеге имканлыкъ болду.
«Пальмирада» юрюлеген агьвалатлагъа гёре, Дагъыстанны тав юртунда къатыны оьлюп янгыз яшайгъан врач оьр охув ожакъда охуйгъан къызы нечик буса да Сириягъа ИГИЛ-ни (РФ-де гери урулагъан къурум) уьюрю болуп гетгенин биле. Артына-алдына къарамай дегенлей, бары да ишин де ташлап, къызыны артындан ону къутгъармакъ учун чыгъып гете.
«Пальмираны» артистлерини ахыры яда кинону барышы нечик болажагъы, озокъда, белгили тюгюл. Буланы барын да гелеген 2019-нчу йылда Россияны киноэкранларындан къаравчулагъа гёрсетмеге гёз алгъа тутулгъан.
«Пальмираны» чыгъарагъан режиссёрну мурадыны гьакъында айтсакъ, Иван Болотников эсгерген кюйде, кино гьалиги заманны, бугюнлерде яшавубузда ёлугъагъан агьвалатланы суратлай. Эсгерилген кинофильмде баш ролну венгриялы Геза Морчани ойнай. Шолай да, артистлер Екатерина Крамаренко, Даниэла Стоянович, Дариус Гумаускас ва Азербайжанны ат къазангъан артисти Вагиф Керимов къуршалгъан. «Пальмираны», янгыз Дагъыстанда Магьачкъала, Дербент шагьарларда тюгюл, Санкт-Петербургда, Тюркияда ва Сирияда да съёмкалары юрюлежек.
