Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности "Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИВнимание! Конкурсы!Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
"ЁЛДАШ" ГАЗЕТ

Къумукъ театрны янгы премьерасы


Оьтген жумагюн, ноябр айны 9-нда, А-П. Салаватовну атындагъы Къумукъ пачалыкъ музыкалы-драма театрны сагьнасында янгы спектакл­ни премьерасы болду. Оьзю язгъан «Эшеккъулакъ» деген пьесагъа гёре шо спектаклни сагьнагъа Россияны инчесаниятыны ат къазангъан чалышывчусу, белгили режиссёр Ислам Казиев салгъан.


Театрны эркин залында ярыкълар сёндюрюлюп, сагьнадагъы гьаракат башлангъанча ону булан этген лакъырлашывну барышында ол булай деди:


–Халкъ хабаргъа гёре язылгъан бугюн ахшам бу биз гёрсетежек музыкалы тапшурмалы хабардан алынгъан агьвалатлар бырынгъы къумукъ юртда юрюле буса да, мен гьисап этеген кюйде, биз яшайгъан гьалиги заманны гюнлеринде де маънасын тас этмеген. Сагьнада юрюлеген гьаракатдан таба адамгъа гьар къачан да гьалал ишлеп, гьалал ашын ашап яшамагъа тюшегени гьакъында бирдагъы да айтып, къаравчулагъа етишдирмеге сюебиз. Сонг да, уругъа белсенип оьмюр сюреген гьар ким де ят гишини малын урлап къоймай, инг алда оьзюню яшавун урлай. Нечик алай да, аз урласанг да – уру, кёп урласанг да – уру, уруну арты буса къуру бола. Къаравчуланы артыкъ кепине гелсин учун пьесаны сагьнагъа онгарагъанда музыкалы спектаклни жанрын танглагъанман,– деди И.Казиев.


Оьрде эсгерилген спектаклни игитлерини сагьнада келпетлерин яратгъан РФ-ни ат къазангъан артисти К. Жабуковну, ДР-ни ат къазангъан артисти П. Ихиловну, ДР-ни ат къазангъан артисти М. Къасимовну, РФ-ни ат къазангъан артисткасы Т. Осаеваны, ДР-ни ат къазангъан артисткасы З. Межитованы, З. Аселдерованы оюну таъсирли болду.


Бу спектаклге къуршалгъан артистлени эсгере туруп, гиччи буса да, къарт Макъсутну ролюн пагьмулу ойнап, къаравчугъа уста кюйде етишдирме бажаргъан РФ-ни ат къазангъан артисти Б. Осаевни, олай да гьюрбеч сатывчуну келпетин яратгъан ДР-ни ат къазангъан артисткасы П. Керимованы оюнун да айрыча эсгермеге ярай. Чанакъны, олай да Лётюну келпетлерин яратгъан театрны яш артистлери С. Идрисов ва Г. Жалилованы оюну да къаравчуланы рази этди.


Танапусну вакътисинде спектаклге къарамагъа юртлардан гелген къаравчулар айтгъан пикрулары да шогъар шагьатлыкъ эте. Шу ерде шоланы да экисини пикрусун сизин тергевюгюзге бермекни тийишли гёремен.


Сапият Сахавова, Халимбекавул:


– Спектакль къаравчулагъа англашылагъан бек тынч тил булан юрюле. Тюрлю макъамлар кёп согъула, йырлар йырлана. Шондагъы агьвалатлар бырынгъы заманларда юрюле буса да, бугюнлердеги бизин яшавгъа да рас гелмей къалмай. Гьар заманда йимик бизин сююмлю артистлерибизни оюну къаравчуланы рази эте. Гьатта олар сагьнада яратагъан келпетлеге оланы къылыкъ-хасиятын, ич дюньясын ачыкъ этердей атлар да берип нече де бажаргъан автор.


Бурлият Акамова, Чонтавул:


– Къумукъ театргъа чакъда-чакъда да гелемен. Бугюн янгы спектаклни премьерасына гелгениме бек шатман, гьатта залда аз буса да бош къалгъан ерлени де нече де зая гёрюп тураман. Сагьнада оьзлени гёрген сайын, мен оюнундан тоймайгъан Байсолтан ва Тотуханым Осаевлени бирдагъы да гёрюп сююндюм. Оьр даражадагъы пагьмусу булан къумукъ халкъны тезден берли сюювюн къазангъан айтылгъан артистлерибиз булан бирче яш артистлер де келпет яратывда янгыз оьзлеге хас къайдаланы тапгъан. Сав болсунлар барысы да! Ислам Амашевичге де шулай пагьмулу спектакл­лени дагъы да кёп салмагъа насип болсун.


Озокъда, спектаклни къаравчугъа гёрсетгенче, уьстюнде ишлеп, оланы разилигин алмагъа къасткъылгъаны гёрюне эди. Тек бир-бир кемчиликлер де эс этилмей къалмады. Шо гьакъда айта туруп, агьвалатлар бырынгъы девюрлерде юрюле болгъан сонг, спектаклде милли макъамлагъа рас гелсе де, гьалиги замандагъы музыкалы согъув алатлар къолланып онгарылгъан макъамлар пайдаландырылагъаны къулакъгъа тамаша тие эди. Сонг да, спектаклни барышында топуракъ къазмакъ учун пайдаландырыла­гъан иш къурал гьисапда Эшеккъулакъны къолундан бел тюшмейгени къыйышып да битмейдир деп эсиме геле.




Количество показов: 97
16.11.2018 14:00

Возврат к списку

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта