Къайтарыш къуллукъдан гьасил бола


Дагъыстан Россияда аграр респуб­лика гьисапда танывлу. Да­гъысын айтмагъанда, бизин республикабызда, савлай уьлке оьлчевюнде алгъанда къой-малланы оьсдюрювде биринчи, Темиркъазыкъ-Кавказ федерал округда гьайван сакълавда 3-нчю ва савлай Россияда юзюм къайтарывда гьюрметли экинчи ерлерде токъта­гъаны тергевню тартмай болмай.



Артдагъы йылларда «Агропромышленный тармакъны асувлугъу учун» деген агьамиятлы проектни ичинде айрыча хат булан эсгерилген тармакъланы янгыртыв намуслу кюйде къуллукъ этивден гьасил бола. Эгер де къайтарыш болгъанны сюе буса, шо гележекде де юрт хозяйство маллар булан машгъул бола­гъан тайпаланы алдында аслу борч болуп токътай.



Гьали-гьалилерде янгы йылны алдында Магьачкъалада Дагъыс­танны юрт хозяйство ва сурсат министерлигини сиптеси булан «РГВК» деген радио-телекампанияда оьтгерилген «ток шоу» да АПК-ны къуллукъчуларыны алда токътагъан борчланы яшавгъа чыгъарылывуна ва шолай да 2019-нчу йылгъа белгиленген пачалыкъ тапшурувланы гьисапгъа алып оьтгерилди. Шонда буса бизин республикабызны юрт хозяйство тармакъда чалышагъан алимлери, белгили касбучулары, районланы башчылары ва шолай да производствону алдынлылары ортакъчылыгъын болдурду.



– Арадан бирдагъы юрт хозяйство йылыбыз гетип бара, – деди оьзюню гиришив сёзюнде Дагъыс­танны юрт хозяйство ва сурсат министри Абдулмуслим Абдулмуслимов. – Шону гьисапгъа алып, бугюн биз етишилген натижаланы гьа­къында айта туруп, алда токътагъан борчланы да токъташдырабыз. Алдагъы йыл булан тенглешдиргенде, бу йылны натижалары бир къадар къолай болду. Юзюмчюлюк – бизин республикабызны экономикасын белгилейген аслу тармакъ. Бу йыл 171 минг тон юзюм салкъын къолгъа алынып, шону 121 минг тоннасы ерли заводларда ишлетилинди. Бавчулукъда да тюшюм алдагъы йыллардан эсе къолай. Гьайванчылыкъ, малчылыкъ, къушчулукъ булан янаша артдагъы вакътилерде теплицаларда овощлар оьсдюрювге де айрыча агьамият берилегени гьакъда разилик булан эсгерме тюше. Гележекде де шолай мердешли тармакъланы янгыртывда гьаракатны артдырмакъ умут этиле. Юрт хозяйствода бары да тармакълар бири-бири булан тыгъыс кюйде байлавлу. Ону учун гьайванчылыкъ, малчылыкъ, къушчулукъ тармакъланы оьсдюрювде ем оьсюмлюк­лени, ашлыкъланы чачыв майданларын генглешдирив де – агьамиятлы масъала.



Эсгерилген ёлугъувну ортакъчылары да, министрни сёйлевюне сесленип, алда токътагъан масъалаланы ёрукълашдырывгъа байлавлу оьз пикруларын айтмай болмады.



– «Сув болмаса, гёнгюл ачмай гюл терек», – деп башлады оьзюню ойларын малим эте туруп, Къаягент райондагъы алдынлы ГУП-ну (пачалыкъ унитар предприятие) директору Бурлият Гьажиева. – Бизин хозяйство юзюм оьсдюрювде районда тюгюл, савлай республика оьлчевде де алдынлы хозяйстволаны бириси санала. Шо саялы да гележекде натижалар дагъы да къолайлашсын, хайыр кёп болсун учун юзюмлюклени сугъармагъа имканлыкълар болдурувда уьстдеги къурумларындан, пачалыкъны янындан кёмек къаравуллап турабыз. Айтагъаным, районда эки-уьч ерде сув гьавузлар къурсакъ асувлу болур.



Гьакълашывланы, сынав алышдырывну натижасында ону ортакъчыларыны пикрулары, таклифлери гьисапгъа алынды ва гележекде юрт хозяйствону асувлугъу учун бары да имканлыкъланы къоллама тюшегени бир гёнгюлден якъланды.



Авторизация
*
*
Регистрация
*
*
*
Согласны с условиями сайта?
Генерация пароля