Къызамукъдан авруйгъанлар аз болмай


Биз газетибизни бир нече номерлеринде къызамукъ аврувгъа къаршы чечек яздырма сюймейгенлеге байлавлу маълуматлар берген эдик. Нечакъы бере турсакъ да, тек къызамукъдан авруйгъанланы санаву я сейир болмай, шогъар ата-аналар да къулакъасма сюймей.




Дагъыстанны савлукъ сакълав министерлигини инфекция аврувлагъа къарайгъан бёлюгюнден бизге билдирген кюйде, йылны башындан тутуп бугюнлеге ерли республикабызда къызамукъдан 186 адам авруп тура. Ону булан да дазуланып къалмай, дагъы да 88 яшгъа байлавлу шеклик тувулунгъан. Бары да авруйгъанланы гьисап этгенде, чинк де кёбю, 55 проценти, Магьачкъаладыгъылар экени токъташдырылгъан.



Аслу гьалда къызамукъ сабий тайпагъа бек югъа. Беш йылдан тогъуз йылгъа ерли чагъындагъыланы арасында шо аврув чинк де бек яйылгъаны да ачыкъ болду. Айрокъда бу йылны апрель айында шо къызамукъдан авруйгъанлар эпсиз кёп эди. Тюзю, август айда бираз эниш болма башлагъан. Тек савлай республиканы алгъанда, къызамукъну яйылывуну гьалы къувун салагъан даражада экенине агьамият берме тарыкъ.



Гетген йыл къызамукъдан 99 адам авругъан. Бу йылны натижаларына гёре, гетген йылдан эки керенге артыкъ. Шолай къувун гётерер йимик гьал тувулунгъанлыкъгъа ата-аналар яшларына чечек яздырма сюймейгенлик себеп болгъан. Шону учун жамиятны, айрокъда чечек яздырывдан баш къачырагъан ата-аналаны арасында англатыв ишлер юрютмеге герек.



Шогъар байлавлу гьаракатлар да юрюле. Мисал учун, чечек этилинмеген яшланы бир-бир охув ожакълардан заманлыкъгъа азат этелер. Ондан къайры да, чечек язылмагъан ва гьалиге къызамукъдан аврумагъан яшланы иммунитетин гётермек учун чаралар гёрюле. Бугюнлеге ерли 33 минг адамгъа тийишли дарман этилинген, оланы арасында 17 йыллыкъ чагъына ерлиги 13 минг яш да бар. Сонг да, тыш пачалыкълагъа чыкъма хыялы барлар эки жума алда къызамукъгъа къаршы чечек яздырма тюшегенни унутмагъыз.



Авторизация
*
*
Регистрация
*
*
*
Согласны с условиями сайта?
Генерация пароля