Билим берив ожакъланы ёлбашчыларыны форуму


Алдагъы гюнлерде «Дагъыс­тан» деген маълумат агентлигинде «EduWave» деген билим берив индуст­рияны вакиллери юрютеген форумуну къурум комитетини ортакъчылары булан прес-конференция оьтгерилди. Прес-конференцияда Магьачкъала шагьарны администрациясыны башчысыны заместители Запир Алхасов, Дагъыстанны педагогларыны бирлешивюню председатели Анжела Байрамбекова, «Атлас Коммуникации» деген къурумну генеральный директору Татьяна Рантина ва билимлени камиллешдиреген Магьачкъала центрны директору Магьаммат Абакаров ортакъчылыкъ этди.



Билим берив индустрияны ёлбашчыларыны форуму Къарабудагъгент районда ерлешген «Каспий» деген санаторийде сентябр айны 21-нден- 23-не ерли оьтгерилежек. Татьяна Рантинаны айтывуна гёре, эсгерилген форум пачалыкъ ва онгача иш гёреген школаланы ва къошум билим береген центрланы ёлбашчылары учун пайдалы болажакъ:



–Биз кёп йылланы узагъында билим берив къурумланы ёлбашчыларыны ва муаллимлерини касбу оьсювюню гьа­йында иш гёребиз. Форумгъа биз Россияны гьар тюрлю ерлеринде къолланагъан ва оьзлени яхшы яндан гёрсетген къошум билим беривню программаларын гелтиргенбиз.



Форумну оьтгермекни маънасыны ва себеплерини гьакъында айта туруп, билимлерин камиллешдиривню Магьачкъала центрыны директору Магьаммат Абакаров булай деди:



–Дагъыстандагъы билим берив центр­ланы ёлбашчыларыны кёбюсю гьалда башчылыкъ этив мердешлери акъсакълай. Бугюнлерде буса къошум билим беривню программаларын бизин школаларда да яшавгъа чыгъармагъа герек.



Форумгъа бугюнню талапларына жавап береген янгы къайдалар булан иш гёрме уьйренмек ва билим беривню сан янын артдырмакъ учун школаланы ёлбашчыларын чакъырабыз. Бизин къонакъларыбыз бу тармакъда ёлугъагъан масъалаланы ва уьстюнлю сынавуну гьакъында сёйлежек. Форумну баш мурады – ону ортакъчылары Россияны алдынлы центрларында къошум билим беривню къайдалары нечик иш гёрегенни гёрсетмек.



Магьачкъала шагьар администрацияны башчысыны заместители Запир Алхасов бизин республикада къошум билим беривге тергев этмеге, ону къолламагъа герекни себеплерин айта туруп булай деди:



–Ата-аналар бугюнлерде бир де болмагъан йимик яшларын охутувгъа теренден тергев бере. Яшларын охутувгъа бары да гючюн, гьатта харжын бакъдырмакъ, оланы гележеги учун инг де пайдалы болажакъны ата-аналар да яхшы англайгъан болгъан. Къошум билим беривню тармагъы охувчулагъа янгыз билим алывда тюгюл, сонггъу яшавунда да тарыкълы болажакъ. Бугюнгю яшавда школаланы директорлары янгыз яхшы педагоглар болуп къалмайлы, мекенли менеджерлер ва ёлбашчылар да болмагъа герек.



Дагъыстан педагогланы бирлешивюню ёлбашчысы Анжела Байрамбекова билим беривню аслу мурады бажарывлу ва уьстюнлю охувчуну тарбияламакъ экенни эсгерди ва булай узатды:



–Шо муратны яшавгъа чыгъарывну бир-бир шартлары буса къошум билим берив экени англашыла. Бизин белгили академиклерибиз оьзлени биринчи абатларын школадагъы къошум дарсларда алгъан. Бугюнлерде де къошум билим беривню кёп уллу маънасы бар.



Форумда Россияны шагьарларындан бизин иш ёлдашларыбыз гелтирген сиптелер ва проектлер малим этилежек. Гьар ёлбашчы тергелген, сыналгъан къошум маълуматланы алажакъ.



Авторизация
*
*
Регистрация
*
*
*
Согласны с условиями сайта?
Генерация пароля