Ярмакю еттинчи гезик оьтгериле


Магьачкъаладагъы милли китапханада сентябр айны 20-сындан 22-си болгъанча «Таргъу-Тав» деген дагъыс­тан китап ярмакю еттинчи гезик оьтгериле. Алдындагъы гюн 19-нчу сентябрде ярмакюню оьтгеривге байлавлу къурулгъан комитетни ортакъчылары журналист Марат Гьажиев ва язывчу Сайит Иналалов журналистлер булан прес-конференция оьтгерди ва ярмакюню гьакъында булай маълуматлар берди.



Ярмакюню биринчи гюню милли адабиятлагъа багъышлана. Сагьат онгъа ярымдан тутуп, выставкагъа салынгъан китаплар булан таныш болув башлана. «Таргъу-Тавну» лап яхшы китабы деген конкурсгъа гелген китапланы малим этив ачыла. Сагьат он экиден бир болгъунча «Адабият марофонну» барышында Расул Гьамзатовну шиърулары охула. Язывчу Шапи Къазиевни «Расул Гьамзатов» деген китабын малим этив юрюле.



Халкъара «дёгерек стол» «И Неман впадает в Каспийское море» деген тема булан оьзюню ишин башлай. Беларус-Кавказ китап чыгъарыв аралыкълар, бирче иш гёрювню гьакъында Беларуссияны милли китапханасы булан дыгъарлар байлана.





Бу гезик «Таргъу-Тав» деген китап ярмакюге Россияны шагьарларындан ва тыш уьлкелерден кёп къонакълар жыйылгъан. Москвадагъы китапланы музейини директору Людмила Шустрова, Нальчикден шаир ва журналист Светлана Моттаева, «Литературная Газетаны» бёлюгюню редактору Владимир Сухомлинов, балкъар шаир Салигь Гуртуев, Москвадан адабият танкъытчы Галина Юзефович, яшлар учун язагъан язывчу Валентин Постников , Москвада «Август» деген издательствону директору Маша Вайсман, язывчу Денис Драгунский гьариси гелгенлер булан ёлугъувлар оьтгерди, жыйылгъанланы соравларына жаваплар берди.



Яшлар учун чыгъарылагъан китапланы гюню 22-нчи сентябрде оьтгерилди. Язывчулар В.Постников, Е.Усачёва яш охувчулар булан ёлукъдулар. Яшлар учун язылгъан китапланы малим этив де юрюлдю. Оьзге йыллардагъы ярмакюлерден эсе бу йылгъы китап ярмакю гелген къонакълардан, авторлардан да, китаплардан да бай ва дагъыстанлылар учун пайдалы болажакъ деп билдирди комитетни ортакъчылары.



Авторизация
*
*
Регистрация
*
*
*
Согласны с условиями сайта?
Генерация пароля