Ярым йылны гьасиллери…


Июль айны 23-нде Дагъыстан Республиканы ич ишлер министерлигинде ведомствону ёлбашчысы Абдурашит Магьамматов генглешген жыйын оьтгерген. Ону барышында республиканы ич ишлер бёлюгю 2018-нчи йылны биринчи яртысында юрютген гьаракатыны гьасиллери чыгъарылгъан, экинчи яртысында гёз алгъа тутулгъан масъалаланы гьакъында айтылгъан.

 



Жыйынны ача туруп, Абдурашит Магьамматов яшынып, жинаятчылыкъ иш юрютеген уьюрлер бирдокъда дагъытылып битмегенни гьакъында айтгъан ва эки гюн алда полицияны эки къуллукъчусуна чапгъын этип, бандитлер оланы оьлтюргенни эсгерген.



Жыйында доклад эте туруп, Дагъыстанны ич ишлер министрини заместители Агьмат Баталиев билдирген кюйде, бу йылны алты айыны ичинде жинаятчылыкъ 4,5 процентге артгъан. Шагьарланы арасында айрокъда криминал гьал бузукъ деп саналагъанлары: Буйнакск, Избербаш ва Каспийск. Районлардан: Къызылюрт, Агул, Акъуша, Гергебил, Лаваша, Новолак, Ногъай, Рутул, Сергокъала, Тлярата ва Хунзах.



Ахырына чыгъарылып ахтарылгъан жинаятчылыкъ ишлер 6 минг 278 болгъан. Оларда ортакъчылыкъ этгенлени санаву − 4 минг 710 адам.



Гертиден де, жинаятчылыкъ ишлени ахтарывда ва оланы алдын алывда террорчулукъгъа ва экстремизмни идеологиясына къаршы гьаракат юрютювню масъалалары биринчи ерге салына. Шогъар байлавлу оьтгерилген чараланы вакътисинде ихтиярлар якълав къурумланы вакиллери ерни къазып этген уьч тёлени тапгъан. Атышыв савутлар ва патронлар яшыргъан ерлери 13 болгъан.



Къолгъа гелме сюймей атышыв этгенде, бандитлени 18-зи оьлтюрюлген, 74 адамны тутгъан. Юрютген ёлуна гьёкюнюп 4-вю оьзлер гелип полицияны къолуна тюшген. Ихтиярлар якълав къурумланы къуллукъчуларына къаршы 11 керен жинаятчылыкъ юрюлген. Оланы 6-ву оьлген, 8-вю яралангъан.



Жыйынны ишинде республиканы Гьукуматыны Председателини заместителини борчларын заманлыкъгъа кютеген Рамазан Жафаров да ортакъчылыкъ этген, ону ахырында полиция къуллукъчуланы яхшы иш гёрсетгенлерине савгъатлар тапшурулгъан.



 

М. Эсенбиев.



Авторизация
*
*
Регистрация
*
*
*
Согласны с условиями сайта?
Генерация пароля