Янгы охув йылгъа – янгы школалар


Белгили экени йимик, бизин республикада охув йылны алдында 15 янгы школаны бинасы пайдаландырывгъа берилген. Шолардан 7-си – оьзлени къурулушу гьар тюрлю себеплеге гёре узакъ йылланы боюнда узатылып тургъан имаратлар.



«Билим беривню оьсдюрюв» деген пачалыкъ программаны оьлчевюнде таман чакъы акъча маялар гёрсетилгенини яхшылыгъындан гьалиге ерли къурулушу токътатылып тургъан охув ожакъланы муратгъа къыйышывлу тийишли ишлерин тамамлап, пайдаландырывгъа бермеге имканлыкълар тувулунгъан. Ачыкълашдырып айтгъанда, оьрде эсгерилген пачалыкъ программаны яшавгъа чыгъармакъ учун гёрсетилген акъча маялардан школаны биналарыны къурулушун тамамламагъа 456 миллион манат, демек, федерал бюджетден 433, республика бюджетден де 22 миллион манат харжлангъан.



Ачыкълашдырып айтгъанда, «Темиркъазыкъ-Кавказны федерал округун оьсдюрюв», олай да «Школа – 2025» деген программаны оьлчевюнде къурулгъан янгы школаланы биналары кёбюсю тав ва тавтюп, олай да тюзлюк районларда ачылгъан.



Шолай, Хумторкъали районну Алмалы юртунда да охув йылны биринчи гюнюнде билим алывун узатагъан яшлагъа ва охув ожакъгъа башлап абат алагъан гиччипавлагъа янгы къурулгъан эркин школаны эшиклери ачылды. Шо да юртлулар учун уллу агьамияты булангъы агьвалат болуп токътады. Билим берив ожакъны янгы бинасын пайдаландырывгъа беривге байлавлу шатлыкъларда ДР-ни Гьукуматыны биринчи заместители Анатолий Карибов ортакъчылыкъ этгени де бизин республиканы гьакимлик къурумлары охувчу яшлагъа билим алывгъа тийишли имканлыкълар яратывгъа мекенли кюйде тергев берегенин исбатлай.



А. Карибов жыйылгъанланы алдына чыгъып сёйлей туруп, Алмалы юртда къурулуп, пайдаландырывгъа берилген охув ожакъны янгы бинасы, савлай респуб­ликаны гьисапгъа алгъанда да, гьалиги яшавну бары да талаплагъа жавап береген идараларыны бириси экени гьакъда эсгерди. Шону булан бирге, эсгерилген охув ожакъда билим алагъан яшлагъа ва оланы муаллимлерине гележекде де оьрлюклер ёрады.



Хумторкъали районну гьакимбашыны борчларын заманлыкъгъа кютеген Райисат Рамазанова да юртлулар шу агьвалатны 40 йылдан да артыкъ вакътини ичинде къаравуллагъаны гьакъда айтды. Янгы школаны бинасы пайдаландырывгъа берилгенлик булан охувчу яшлагъа билим алмагъа шартлар яхшылашагъанын билдирди. Шондан къайры да, охувчу яшлагъа ерли билим берив ожакъда ерлер болдурувну масъаласы ювукъ вакътини ичинде тувулунмажа­гъын ташдырды.



Ерли гьакимлик къурумуну жавап­лы къуллукъчулары ортакъчылыгъын болдургъан Алмалы юртдагъы янгы школаны бинасыны ачылывуна байлавлу шатлыкъланы ахырында «Анжи-академиягъа» къуршалгъанлар топ оюнда оьзлени пагьмусун ва бажарывлугъун гёрсетди.



Бизин газетни оьз мухбири Гебек Къонакъбиев де билдирегени йимик, Хасавюрт районну Къарланюрт ва Къадиротар юртларында да охув йылны башланывуна билим берив ожакъланы янгы биналары пайдаландырывгъа берилген. Шолар экиси де билим берив тармакъда бугюнлерде токъташдырылгъан гесимлени яшавгъа чыгъармакъ учун имканлыкълар болдурулгъан.



Шо гюн Къарланюртда оьтгерилген шатлыкъларда ерли гьакимлик къурумларыны вакиллери булан бирче РФ-ни Президентини Темиркъазыкъ-Кавказ федерал округдагъы толу ихтиярлы вакилини кёмекчиси Татьяна Шершнева, ДР-ни Гьукуматыны Председателини заместители Гьажимагьаммат Гьюсейнов ва ДР-ни Халкъ Жыйыныны депутаты Багъадур Абасов ортакъчылыкъ этген.



Къадиротар юртда янгы школаны ачылывуна байлавлу шатлыкъларда Загьир Боташев де ортакъчылыкъ этген. Шо гюнгю шатлыкълар чебер иш гёреген йыравланы чыгъышлары булан тамамлангъан.



Авторизация
*
*
Регистрация
*
*
*
Согласны с условиями сайта?
Генерация пароля