Алимлер Магьачкъаланы тарихин ахтара


Магьачкъала шагьарны администрациясы шагьарны къурулгъан заманын токъташдырмакъ муратда ёлугъув оьтгерген. Онда Магьачкъала шагьарны башчысыны борч­ларын заманлыкъгъа кютеген Мурат Алиев, тахшагьарны башчысыны заместители Запир Алхасов, Россияны илмулар академиясыны тарих ва маданият институтуну директоруну заместители Наталья Соловьёва, олай да тахшагьарны администрациясыны маданият управлениесини начальниги Фарид Абалаев ортакъчылыкъ этген.



Хас кюйде Дагъыстанны тахшагьарына 161 йыл бола деп юрюле. Мурат Алиев айтгъан кюйде, шону герти тарихин токъташдырма тарыкъ. «Ахтарывлар, мен ойлашагъан кюйде, шо масъаланы чечме кёмек этежек. Бизин Таргъу деген оьзюне минг йылдан да къолай болагъан бек­лигибиз болгъан. Археология ахтарыв ишлер юрюлсе, шо агьвалатны илму якъдан гёрсетме имканлыкъ болажакъгъа инанаман», – деген ол.



Наталья Соловьёва эсгерген кюйде, Дагъыстанны тахшагьары бар ерде гьалиден минг йыллар алда адамлар яшагъанны токъташдырагъан далиллер бар. Бизин москвалы касбу ёлдашларыбыз шо гьалны ахтаргъан. Буса да, масъаланы белгисиз ерлери де бар. Ону археология ахтарывлар токъташдырма болур.



Шогъар гёре де, алим къатын гьисап этеген кюйде, тарих маълуматлар тарыкъ, олай да шолай масъаланы ахтарагъан илму маълуматлар, шону булан машгъул болгъан ва къачан болгъан тарихи язывланы барын да ва карталаны жыйып, къарама тарыкъ.



«Магьачкъала шагьар адамлагъа яшама онгайлы тавну да, денгизни де арасында, агъачлыкъ ва балыкъ бар ерде ерлешген. Ари де, бери де барагъан кериванлар да ондан оьтме герек болгъан. Мунда Таргъу шагьар-беклик болгъанлыкъны токъташдырагъан кёп санавда тарихи маълуматлар, авуз яратывчулукъну маълуматлары да бар. Ахтарывлар юрютгенлени бирлери гьали де сав, оланы ахтарывларын да къоллама ярай, бирдагъылары оьзлени эсделиклерин къоюп гетген. Оланы барын да жыйып, гьалиги кюрчюге салма герекбиз», – деген Н.Соловьёва.



Ахтарывлагъа ерли халкъны эсге алывларын да къоллама ярай. Масъала янгыз Магьачкъаланы тархын токъташдырывда тюгюл. Бу ерлени гелеген туристлени гёнгюн алагъан кюйде этме герекликде.



Н. Соловьёва «Ёлдаш» газетни редакциясында да болду ва газетни баш редактору Камил Алиев булан болгъан ёлугъувда эсгерилген масъалалагъа да къаралды.



Ёлугъувну тамамлай туруп, Мурат Алиев гётерилген 
ма­съаланы девюрлеге бёлеген план къурма герекни ва ондан сонг ишге гиришме герекни гьакъында айтгъан.


 

Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля