Агьамиятлы таклифлер берилди


Дагъыстан оьзтёрече табии шартлары, байлыкълары, гьаракатчы адамлары булангъы республика гьисапда танывлу. Тек не этерсен, шогъар да къарамайлы, бизин уьлкебиз социалист жамиятдан капиталист жамиятгъа гёчеген девюрде шолай имканлыкълар асувлу кюйде пайдаландырылмайгъаны юрекни рази къалдырмай.



Дагъыстан, савлай Россия оьлчевюнде айтгъанда, социал-экономика якъдан оьсювде артда къалагъан регионланы арасында ерлешген. Шону гьисапгъа алып, ДР-ни гьалиги башчыларыны сиптечилиги булан оьсюп гелеген яш наслуну далапчылыкъ гьаракатын болдурмакъ муратда оьтгерилеген чаралар да тергевню тартмай болмай.



Айтмагъа сюегеним, бугюнлерде экономикасы, яшаву оьсген регион Татарстандагъы сынавну бизин республикабызда да пайдаландырывгъа байлавлу болуп бир башлап «Дагъыстан» деген маълумат агентлигинде прес-конференция болду. Шондан сонг артындагъы гюн тахшагьарыбыздагъы «Дослукъ» деген уьюнде Татарстанны экономика министерлигини ва Къазан федерал университетни сиптечилиги булан эки де республиканы далапчылыкъ булан машгъул тайпаларын да къуршап, бизнесге муштарлы яш наслу булан далапчылыкъгъа байлавлу бизнес дарсы оьтгерилди. Бизнес дарсны хас проектни сиптечиси Айдар Булатов ачды ва юрютдю.



– Биз гьаракатгъа-берекет девюрде яшайбыз десек де, гьакъыкъатгъа къыйышмай къалмас, – деп башлады оьзюню сёзюн агьамиятлы жыйынны ачылывуна байлавлу сёйлевюнде ДР-ни Гьукуматыны Председатели Артём Здунов. – Айтмагъа сюегеним, гьалиги вакътиде далапчылыкъ тармакъда бар имканлыкълардан бажарывлу кюйде пайдаланмагъа тюше. Дагъыстанны башчылары бизнес булан машгъул болма муштарлылар учун гьар-бир якъдан кёмек гёрсетмеге гьазир. Шо кюйде пачалыкъны янындан да далапчылыкъ булан машгъул болма сюегенлеге тийишли онгайлыкълар болдурулагъаны Дагъыстанда да бизнесни оьсювюне кёмек этежегине шеклик этме тюшмей. Айырып айтсакъ, бизин республикабызда адамлар ва юклер учунгъу транспорт, туризм, табии байлыкъланы пайдаландырыв ва башгъа-башгъа тармакъларда бизнес-проектлени къурмагъа ва къолламагъа ёллар ачыкъ. Шону учун биз сизден таклифлер де къаравуллайбыз.



Шондан сонг залда жыйылгъанланы алдына чы­гъып эки де республиканы сынавлу далапчылары бизнесге муштарлылар учун пайдалы таклифлер берди. Берилген таклифлени, эки сагьатны узагъында юрюлген бизнес дарсны жамы чыгъарылды. Уьстюнлюкню аслу шарты тартывдан тартынмайлы, оьзюню муратларына инамлыкъ булан янашыв ва бажарывлулукъ болуп токътайгъаны гьакъ.



Бизнес дарсны ахырында Артём Здунов ва Айдар Булатов республикабызны маълумат къуралларыны къуллукъчуларыны соравларына жаваплар къайтарды.





Авторизация
*
*
Регистрация
*
*
*
Согласны с условиями сайта?
Генерация пароля