Агьамиятлы масъалалагъа къаралгъан


Пятница, 18.05.2018г. - "ЁЛДАШ".


Дагъыстанны Башчысыны борчларын заманлыкъгъа кютеген Владимир Васильев ёлбашчы пачалыкъ къурумланы ёлбашчыларыны ортакъчылыгъы булан генгеш оьтгерген. Ону гюнлюк низамына бир нече агьамиятлы масъала салынгъан.



Генгешде биринчи болуп ёлларда аманлыкъ учунгъу гьаракатгъа къаралгъан. Владимир Васильев шо масъалагъа байлавлу гьал къы­йынлы деп эсгерген. Май байрамны гюнлеринде болгъан ёл низамны бузагъан 47 агьвалатда 18 адам, оланы арасында 3 яш тас этилген.



«О болма ярайгъан иш тюгюл. Автомобиль гьайдайгъанланы ёл низамны буза­гъанлыкъны алдын алывгъа бакъдырылгъан жавап­лыгъы бар. Олар булан мекенли иш гёрме герек, о масъала гьар адамгъа тийме герек», – деген рес­публиканы ёлбашчысы.



Генгешни оьлчевюнде ону ортакъчылары о масъаланы чечмекни гьакъында ва гьар билим берив къурумну оьзюню автобусу болма герекни гьакъында айтгъан. Дагъыс­тан Республиканы Гьукуматыны Председателини заместители, билим беривню ва илмуну министри Уммупазил Омарова айтгъан кюйде, школалардагъы 575 автобусну 323-ню ишлейген болжалы бу йыл тамамлана. Гьар билим берив къурумгъа артдагъы йылларда автобус алмакъ учун федерал бюджетден 147 миллион манат гёрсетилген. Шону натижасында Дагъыстанда 2016–2017-нчи йылларда школалагъа 88 автобус берилген. Амма, Уммупазил Омарова айтгъан кюйде, шо санав школалагъа азлыкъ эте. Бугюн 419 автобус талап этиле. Генгешде шо ва арагъа салынгъан транспортну гьайдавчуларыны алапа масъаласы да гётерилген. «Сиз ойлашып къарагъыз, аталарсыз, уллаталарсыз, яшланы алып юрюйген автобус гьайдавчугъа 9 минг манат таманлыкъ этеми? Бизин алдыбызда кёп масъалалар токътагъан. Биз гёрсетилген акъчагъа янгы автобуслар алма гёз алгъа тутгъанбыз.


Оьзлени налог гьисапда тутула­гъан харжына алынгъан автобуслар нечик юрюлегенни билсин учун шо чарада ортакъчылыкъ этмеге далапчыланы чакъыражакъбыз. Автомобиль гьайдавчу айына 9 минг манат алагъанны ёлгъа йиберме ярамай. Бир-бир школаларда яшлар администрацияны бинасында охуйлар. Шолай гьал булан рази болуп болмайман», – деген В.Васильев.



Ондан сонг ДР-ни Гьукуматыны Председателини биринчи заместители Анатолий Карибов генгешде жыйылгъанланы спорт ябушувну Дагъыстанда оьтген Европа чемпионатыны натижалары булан таныш этген. Гёз алгъа тутулгъан кюйде, спорт ябушувну Европа чемпионатында 35 уьлкеден 878 спортчу ортакъчылыкъ этген. Умуми кюйде алгъанда, спорт чаралагъа 28 минг адам къарагъан. Спорт натижалагъа гёре буса, тюрлю-тюрлю медаллар алып, Россияны командасы биринчи болгъан.



Владимир Васильев спорт чарада ортакъчылыкъ этген адамлагъа баракалла билдирген. Ол май байрамны онгаргъанлагъа да айрыча баракалла сёзлер айтгъан.



Генгешни жыйынын тамамлай туруп, Владимир Васильев савлукъ сакълавну янгы ёлбашчысын гёрсетген. О ерге пагьмулу, кёп бай сынав топлагъан Жамалудин Гьажииб­рагьимов белгиленген.




Бизин мухбирибиз.

Авторизация
*
*
Регистрация
*
*
*
Согласны с условиями сайта?
Генерация пароля