69 чагъында – алтын белги


Гьали-гьалилерде Магьачкъаланы «Труд» деген стадионунда ГТО-дан Дагъыстан Республиканы чемпионаты оьтгерилди. Чемпионатда 300-ден де артыкъ адам ортакъчылыкъ этген. Ярышланы ортакъчылары оьмюр чагъына гёре пайланып, спортну алты тюрлю журасындан тогъатартгъанлар.



Гьаман да йимик, респуб­лика оьлчевдеги ярышларда оьзюню спорт мердешлери булан макътала гелген бизин районну спортчулары да ортакъчылыкъ этгенлер. Оланы арасында СССР-ни спортуну устасына кандидат, Россияны ветеранларыны арасында оьтгерилеген ярышларда 100 метрге чабывда ва шо оьлчевде тогъаслар булангъы чабывда гюмюш медаль къазангъан Элмурза Тонаев де болгъан.



Ери гелгенде мен гетген йылгъы Республика чемпионатында Элмурза Тонаев алтын медальгъа ес болгъанны эсгермеге сюемен. Оьзю етмиш чагъына чыкъгъангъа къарамай, Элмурза Тонаев бу гезик де яхшы натижалар гёрсетди. Айтагъаным, оьзю ортакъчылыкъ этген 60-69 чагъына етишгенлени арасында юрюлген ярышларда ол токъташгъан нормалардан эсе артыкъ натижа гёрсетип, ГТО-ну 10-нчу канзисини алтын белгисине ес болду.



– Ярышлар эки чакъырымгъа чабывдан, еринден атылывдан, тюбек булан нишангъа урувдан, ятгъан еринден турувдан, ерден къоллары булан къаркъарасын гётеривден, еринде иеливден юрюлдю, – дей Элмурза Тонаев. – Шо тогъатартывларда мен токъташгъан нормалардан эсе яхшы натижалар гёрсетмеге болдум.



Элмурза Тонаевни сёзлерине гёре, ол гьали ювукъ арада 70-74 чагъына етгенлени арасында оьтгерилежек Дагъыстанны чемпионатында ортакъчылыкъ этмеге гьазирлик гёрюп тура. Оьзюню гьаракатчылыгъы булан ол шо ярышларда да оьр канзиге гётерилежекге инанабыз.



Къартлыкъны артгъа теберип, спортда яш наслугъа уьлгю болуп юрюйген спортчубузну гезикли уьстюнлюгю булан къутлай туруп, огъар энниден сонг да дагъы да уллу уьстюнлюк­леге етишмекни ёрайбыз.



Авторизация
*
*
Регистрация
*
*
*
Согласны с условиями сайта?
Генерация пароля