Сетевое издание «ЁЛДАШ» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Сетевое издание «Ёлдаш» (Спутник)

Малик ПАТАГЬОВ:   «Шагьар оьсе, арив бола, тюрлене»

Малик ПАТАГЬОВ: «Шагьар оьсе, арив бола, тюрлене»



КЪЫЗЫЛЮРТ ШАГЬАРНЫ СОЦИАЛ-МАДАНИЯТ ОЬСЮВЮ ТЕРГЕВНЮ ТАРТА

 


Йигирма йыллар алъякъда бизин республиканы шагьарларыны арасында Къызылюрт инг де жагьил ва яшама онгайлы шагьар болгъан экенине о заманларда бу шагьарда тургъанлар бириси де шек­лик этмегендир. О вакъти шагьарны промышленный предприятиелери республикада тюгюл, тышда да белгили эди. Химия завод, Дагэлектроавтомат, Полиграфмаш, Уьйлер къурагъан комбинат, оьзгелери де яш наслуну къуршап ишлеме белсенген.


Заводларда, фабриклерде ишге тюшгендокъ, турма ерлер берегенинден къайры, 6 айны ичинде оьзюнгнюки этилип де яшавлукъ уьйлер берилегени, озокъда, негьакъ болмагъандыр. Къызыл­юртгъа жагьиллени шагьары деп айтагъаны мени оьзюмню де эсимде къалгъан.


Бир нече гюн алда Къызылюрт шагьарны башчысы Малик ПАТАГЬОВ булан ёлугъуп, шагьарны гьалиги гьалыны гьакъында лакъыр этдик. Шо лакъырлашыв сизин тергевюгюзге де бериле.


 

– Малик Абдурагьманович, Къызылюрт гьали де яшама онгайлы ер деп эсиме геле, сиз нечик ойлашасыз?


– Биринчилей, хошгелдигиз деп айтма сюемен, сизге бизин шагьарны къыйыны-тынчына агьамият берегенигиз учун баракалла.


Мен де сизин йимик ойлашаман. Гертиден де, совет девюрде Къызылюрт промышленност янындан бек алгъасавлу гьалда оьсеген шагьар эди. Адамлагъа яшама да онгайлы ер эди. Солакъ оьзен къырыйыбыздан оьте, Хасавюрт, Буйнакск, Магьачкъала шагьарлар барма-гелме йыракъ тюгюл. Темир ёл байлавлукъ бар. Оьзюгюз гёресиз, шагьарда адамгъа да, транспортгъа да тыгъыслыкъ ёкъ. Шагьар майданны айланасында дегенлей промышленный, ашамлыкъ маллар сатагъан уллу тюкенлерибиз бар. Темир ёлдан туннель булан ари чыкъгъан ерде уллу базарыбыз, ари янында маданият къала, орта школа, тюкенлер, больница, поликлиника…


Къызылюрт алда да яхшы эди, гьали де шагьар оьсе, арив бола, тюрлене.


– Солтанянгыюрт да шагьаргъа тийип ерлешген, онда турагъанлар учун да район центрны имканлыкъларындан пайдаланып яшама онгайлы...


– Шагьарлылар саялы да эки якъда, ювукъда юртлар бар экени яхшы. Емишлер, овощлар, акъкъатыкъ учуз. Юртлар булан транспорт байлавлукъ да мекенли салынгъан. Юртлулагъа гелме- гетме де тынч. Ёл гьакъ да багьа тюгюл.


– Мунда алда йимик яшавлукъ уьйлер къурулмайгъаны англашыла. Мен шагьарны социал-маданият оьсювю буссагьатгъы вакъти нечик экенин билме сюемен. Йыл сайын арив болма сюеген къылыкъ, адамларда йимик, шагьарларда да бардыр чы?


– Адамланы яшавун яхшылашдырмакъ учун кютюлеген федерал, республика программаланы яхшылыгъындан буссагьатгъы вакъти шагьарны ва Бавтогъай, Янгы Солакъ посёлокланы ичиндеги халкъ кёп гелеген, ял алагъан ерлени арив этип онгармагъа деп гёз алгъа тутулгъан. Шону учун гёрсетилген харж маялар да бар, къолланып тура.


– Мен гелегенде эс этген эдим, шагьар майдангъа тийип турагъан гиччирек паркны ичинде гьеч ерин къоймагъан кюйде янгыртыв ишлер юрюлюп тура. Къачан битмеге тарыкъ ишлери?


– Бу йылны ахырына бите. Шолай объектлерибиз барысы да 2019-нчу йылны ичинде тюрленивю булан тамашагъа къалдырагъан кюйде онгарылажакъ.


– Гертиден де, арив къуллукъ, шагьарланы тюрлендиреген, арив этеген иш. Шагьарланы онгарывгъа байлавлу федерал программаны яшавгъа чыгъарылыву шо меселли ишлени кютмекни гёз алгъа тута. Шо гьакъда дагъы да ачыкъ болагъан кюйде айтсагъыз яхшы болур эди.


– Шагьарны ичинде гьона шо сиз эсгерген «Игитлени паркы» деп айтагъан ерни ерли къурулуш къурум онгара. М. Чергесов – ону ёлбашчысы. Бу йылны июн айыны 29-нда гьазирленген эди олар булан гьакълашыв кагъыз. Гьар гюн йимик ишлер токъталмай юрюлюп тура.


– Арив этилип онгарылагъан ерлер алты бар деп айтдыгъыз. Оланы къайсыны майданы уллу, харж кёп гетегени къайсыдыр?


– Майданын айтсакъ, инг уллусу – Афгъанистан давда ортакъчылыкъ этгенлеге багъышлангъан гюлбар. 13856 квадрат метр бар. Кёп харж гетегени де шо – 12762 минг манат.


Сонг – Янгы Солакъдагъы гюлбар. Ону майданы эки керенге гиччи буса да, акъча шогъар ювукъ харжланажакъ. Онда яшлар учун уллу спорт майданча ва ойнайгъан ерлер арив этип онгарылажакъ. Ондан къайры да, бавну ичинде волейбол ойнама болагъан спортплощадка да къурулажакъ. Бу йылны декабр айыны 20-сына ишлер тамамланма тарыкъ деп гёз алгъа тутулгъан. Шо къуллукъну «Координатор» деген къурулуш къуруму кюте.


– Дагъы да къайсы ерлерде шагьарны тюрлендиреген ишлер юрюлюп тура?


– Бизин шагьарны айрыча этип гёрсетеген ер Гагаринни атындагъы орам деп эсиме геле. Гёресиз чи нечик арив генг ва узун орамдыр. Тюкенлер, оьзге тюрлю сатыв этеген ерлер де бар. Алда да, гьали де бу орам къызылюртлуланы гелмеге кёп сюеген ери деп айтма да ярай.


Бу орамда «Макътавлукъну аллеясы» деп айтылагъан ер бар, ону да мекенли арив этип онгара турабыз.


Гагаринни орамыны къырыйы булан бирдагъы орам бар янаша гетеген. Гьамзат Цадасаны атындагъы орам. Шо орамда къурулажакъ гюлбарны гьакъында айтдыкъ. «Игитлени майданы» да эсгерилди.            Янгы Солакъдагъы Парковая орамда этилип турагъан ишлер булан да сиз таныш болдугъуз.


Малогьюсейновну атындагъы орамда адамлар юрюйген тратуарны арив этип онгармакъ учунгъу ишлени де «Стандарт» деген къурулуш къуруму юрюте. Майданы 3510 квадрат метр бар. 3829 минг манат харжланажакъ.


Бавтогъай посёлокда да бар Карл Марксны атындагъы орамда гюлбар, 3492 квадрат метр ону майданы да. К.Камилев ёлбашчылыкъ этеген «Радуга-2» деген компания юрюте янгыртыв ишлени. 8086 минг манат харжланажакъ шо ерни арив этип ­онгармакъ учун да.


Гёресиз, Къызылюрт шагьарны гёзеллиги гележекде шулай арив къурулгъан гюлбарлары, аллеялары, парклары булан дагъы да нече керенлеге артажакъ. Къарагъыз гьали, гьариси муна шулай болажакъ къурулуш ишлери битгенде (проект-суратланы гёрсете).


Халкъны социал-маданият оьсювюне де бизин шагьарда тийишли агьамият бериле. Кёп акъча маялар талап этеген бары да пачалыкъ, республика программаланы яшавгъа чыгъарылыву булан адамлагъа яшама онгайлы шартлар яратагъанын бирдагъы керен эсгерсек де кёплюк этмес.


– Малик Абдурагьманович, сизге ва шагьарлылагъа гюн сайын арив болагъан шагьарда парахат яшамагъа насип ёрайман. Гёз алгъа тутгъан умутлагъа етишме насип болсун!


– Сизге де яшавда кёп яхшылыкълар ёрайман. «Ёлдаш» газетни халкъ учун этилеген пайдалы иши кемимесин. Савболугъуз!

 


 

Лакъырлашывну язгъан Набиюлла МАГЬАММАТОВ.

СУРАТЛАРДА: Къызылюрт шагьарны башчысы М. ПАТАГЬОВ;                   

шагьарны гёрюнюшю.



Количество показов: 229
06.09.2019 15:00
Подписывайтесь на канал yoldash.ru в

Возврат к списку


Добавить комментарий

AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта