Пайдалы ёлугъувлар

 
  Дагъыстан Республиканы Гьукуматыны Председателини замес­тители, топуракъ ва  мал-матагь ишлерине къарайгъан министри Екатерина Толстикова Къаягент районда болду. Ону геливюн мунда тезден къаравуллагъан эди. Е.А. Толстикова – ДР-ни Гьукуматында билим алывгъа ва илмугъа байлавлу масъалалагъа жаваплы ёлбашчы. Респуб­ликаны билим беривге ва илмугъа къарайгъан министрини заместители Алексей Карпухинни ону булан районгъа геливю шону бирдагъы исбатлай.


Уллу къонакъланы геливюне байлавлу болуп  район центры Янгыкъаягентде юртланы ва­киллерини ортакъчылыгъы бу­лан жыйын оьтгерилди. Жы­йынны Къаягент муниципал районну Башчысы Магьамматэмин Гьажиев ачды ва юрютдю.


Жыйында  билим беривню сан янын, асувлугъун камиллешдирив, пагьмулу яшлар булан иш юрютюв, оланы танглав ва якълав масъалалагъа къаралды. Сонг Бютюнроссия олимпиадаларда ортакъчылыкъ этивню жамы чыгъарылды, шо ишде сынав топлагъанлар чыгъып сёйледи, оланы сынавун гележекде къоллавну ёллары белгиленди.


Жыйынны ача туруп, районну башчысы М.Гьажиев Екатерина Толстикованы  ДР-ни топуракъ ва мал-матагь ишлерине къарайгъан министри этилип белгиленгени булан къутлады, янгы ишинде уьстюнлюклер ёрады.


Оьзюню къысгъа сёйлевюнде ДР-ни Гьукуматыны Председателини заместители жыйылгъанлагъа пайдалы жыйынны оьтгергени саялы разилигин билдирди. Бютюнроссия олимпиадаларында актив ортакъчылыкъ этген школалагъа дипломлар, уьст болгъан охувчулагъа гьюрметлев грамоталарын тапшурду. Сонг да, Е.Толстикова гележекде Бютюнроссия олимпиадаларында уьст болгъан охувчулагъа, оланы муаллимлерине 150 минг манат, экинчи ва уьчюнчю ер къазангъанлагъа 100 минг манат акъча маялар берилежеги гьакъда айтды. Шолай Указгъа Дагъыстан Республиканы Башчысыны борчларын кютеген В.А.Васильев къол салгъан.


Сёйлевюню ахырында Е. Толстикова районну муаллимлерин, охувчу яшланы етишген уьстюнлюклери булан разилешип къалмай, гележекде дагъы да уллу оьрлюклеге гётерилмеге ва биринчи ерлени алмагъа чакъырды. Шолай уьстюнлюк­лер Россияны айтылгъан оьр охув ожакъларына ёл ачагъанын да билдирди.


Жыйында школаланы ма­териал-техника кюрчюсюн, дарс беривню къайдаларын яхшылашдырывну, муаллимлени касбусуну абурун гётеривню масъалалары да арагъа салынып ойлашылды.

Авторизация
*
*
Регистрация
*
*
*
Согласны с условиями сайта?
Генерация пароля