Эсделик Халкъ язывчубуз бизин арабызда!

 

 Дагъыстанны халкъ язывчусу, драматург Магьамматсолтан Ягьияев къумукъ адабиятда гёрмекли ерни тута. Февраль айны экисинде Дагъыстанны Язывчуларыны союзуну къумукъ секциясында ону эсделигине багъышлангъан жыйын оьтгерилди. Мунда алимлер, язывчулар, къумукъ интеллигенцияны вакиллери жыйылгъан эди. Жыйынны къумукъ секцияны ёлбашчысы, Дагъыстанны халкъ шаири Шейит-Ханум Алишева ачды ва юрютдю.  Халкъ язывчубузну яшавуну, яратывчулугъуну гьакъында къысгъаракъ маълумат берди.


Магьамматсолтан Ягьияев къумукъ охувчугъа оьзюню 1953-нчю йылда язып чыгъаргъан «Гюлайбат» деген повести булан белгили болгъан.Прозаик, драматург гьисапда отуздан да кёп асарлар язгъан. Ону он эки пьесасы Къумукъ театрда ойналгъан ва къаравчуланы разилигин алгъан. Халкъ язывчубуз Хасавюртдагъы педагогика училищени битдирген. 1942-нчи йылдан башлап, Уллу Ватан давда ортакъчылыкъ этген. Къайтгъан сонг Дагъыстан педагогика институтну ва Моск­вада М.Горькийни атындагъы адабият институтну оьр курсларын битдирген. Партия ва совет къурумларда ишлеген «Дослукъ» деген адабият альманахны  редактору болуп чалышгъан. 1957-нчи йылдан – СССР-ни язывчуларыны союзуну члени.



Жыйында  профессор Абдулкъадир Абдуллатипов язывчубуз булан болгъан ёлугъувларыны гьакъында хабарлады.  Бизин эревюллю уланларыбыз Жалалутдин Къоркъмасовну, Уллубий Буйнакскийни гьакъында язгъан романларыны гьакъында айта туруп, къумукъ адабиятда ол къоюп гетген терен маъналы проза ва драматургия асарларын эсгерди. Язывчуланы союзуну правлениесини председатели Магьаммат Агьматов да  халкъ язывчубуз булан бирче ишлегенни, яратывчулукъ ва къурдашлыкъ аралыкъларыны гьакъында айта туруп, огъар абур-сый этгенни эсгерди. Да­гъыстан илму центр­ны старший илму къуллукъчусу Гьасан Оразаев де язывчубуз булан савунда болгъан тыгъыс байлавлукъларыны гьакъында айтды. Шаир ва таржумачы Марина Агьматова  М-С. Ягьияев булан бирче ишлей туруп, кёп санавда ёлугъувлары ва яратывчулукъну гьакъында, таржуманы масъалаларыны гьакъында пайдалы лакъырлары болгъанны, ол гечинген сонг да Къакъашурагъа, оланы агьлюсюне кёп керенлер баргъанны айтды. Жамият чалышывчу Гьюсен Адилов да язывчубузну гьакъында сёйледи. М-С. Ягьияевни къызардашыны къызы Ума амайы оьзлеге нечик исси янаша болгъанны гьакъында айта туруп, ону эсделигине булай жыйынны этгенлеге ва гелгенлеге баракалла билдирди.



Жыйынны ахырында Шейит -Ханум Алишева билдирген кюйде, Уллу Ватан давда ортакъчылыкъ этген ветеранларыбызны, къумукъ язывчуланы, шаирлени  эсделигине Магьачкъаладагъы милли китапханада февраль айны ахырында эсделик ахшам оьтгерилежек.


 


Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля