Заманны талапларына гёре

Уьйге ону есисине къарап багьа бериле дей. Шо тюз буса да ярай. Уьй еси бажарывлу буса, ону ожагъында да бар зат ерли-еринде бола. Школада да шолай. Эгер школаны башын бажарывлу, англавлу, бир ишни  он керен ойлашып этеген директор тутгъан буса, о школаны ишлери де яхшы болажакъгъа шеклик ёкъ.

Шо якъдан алгъанда, Бабаюрт районну Мужукъай юртундагъы агротехнология лицейни коллективине бажарывлу директор булан ишлемеге насип болгъан. «Халкъгъа билим беривню отличниги» деген атгъа ес болгъан Аскер Амангишиевни ёлбашчылыгъы булан школа йыл сайын тюрлене, районну гёрмекли школаларыны бирисине айлана бара. Озокъда, шо ишде ону директоруну ва умуми коллективини аслам къошуму бар.

1968-нчи йыл военныйлар учун казармалар учун гьазир шитлерден къурулгъан Мужукъайдагъы агротехнология лицейни бинасыны ичине гиргендокъ, бир затны айрыча гьис этесен. Шо да –тазалыкъ. Озокъда, булай биналар пачалыкъ стандартына, санэпиднадзорну талапларына къыйышывлу тюгюл буса да, эсгерилген школаны посагъасындан школаны муаллимлери яшавгъа нечесе яшланы узатгъан, оланы нечелери бугюн Ватаныны алдында ватандаш борчларын оьктем кюйде кютюп туралар?!

Лицейни ичине гиргенде, тамлардагъы стендлер оьзлюгюнден тергевюнгню тарта. Онда Уллу Ватан давну игитлерине багъыш­лангъан, терроризмге ва экстремизмге, наркоманиягъа къаршылыкъ билдиривлер, социологну ва психологну мююшю, яшланы ихтиярларын якълавгъа байлавлу ва оьзге тюрлю стендлер ерлешген.

Муаллимлени ишине лап да тюз багьаны  олар охувчуларына береген мугькам билим исбатлай. Яшланы дарслагъа тындырыкълы гьазирлигине айрыча тергев бериле. Охувчулар муаллимлени айтагъан гьар сёзюне, дарсны етдирикли кюйде англатывуна айрыча тергевлю. Класланы ичлери гиччи, муаллимге досканы алдына охувчулар булан ювукъдан пикирлешмеге тюше. Класлардагъы онгайсызлыкълагъа да къарамай, лицейде яллыкъ билмей, охувчуланы нечик уьйретмеге тюшегенни яхшы англайгъан, даим ишинде янгылыкълар излейген ва шоланы къоллайгъан, шону булан бирге касбу бажарывлугъун, усталыгъын артдырывну къастын болдурагъан муаллимлер загьмат тёгелер. Олар яшлагъа гьалиги заманны талап­ларына къыйышывлу кюйде яратывчулукъ ва билим берив даражасын оьсдюрювге тергевюн бакъдыргъанлар.

Агротехнология лицейни директору Аскер Амангишиев муаллим касбуну 2000-нчи йылдан башлап юрюте. Озокъда, шо уллу болжал тюгюл. Амма шо заманны ичинде ол оьзюн янгыз яхшы яндан танытмагъа, коллективни арасында абур-сый къазанмагъа бажаргъан. Загьматында етишген уьстюнлюклерине тийишли багьа берилип, ол 2008-нчи йылда школаны директору этилип белгилене.

Бугюн Мужукъайдагъы агротехнология лицей районда ишлейген эки лицейни бириси гьисапда белгили. Мунда охувчуланы яшдан тутуп юрт хозяйство тармакъда касбучулар болмагъа гьазирлей. Аскер Тавсолтанович айтгъан кюйде, бу охув йылда, умуми кюйде алгъанда, лицейде 92 яш билим ала. Мужукъай юрт советге гиреген Ягъылбай юртдан да школагъа гёрсетилген транспорт булан 24 охувчу геле.

Мунда спортгъа бакъгъан якъда да натижалы иш юрюле. Дагъыстан Республиканы спортгъа къарайгъан министерлигини ва район администрацияны янындан харж гёрсетилип, юртдагъы маданият уьйню ичинде спортзал ачылгъан. Онда волейболну, мини-футболну ябушувуну ва спортну оьзге жураларыны  секциялары ишлей.

Лицейни спортсменлери ябушувдан районда чы нечик де, республика ва Бютюнроссия оьлчевде  оьтгерилеген ярышларда да ортакъчылыкъ этип, савгъатлы ерлеге ес болгъан. Охувчу яшланы уьстюнлюклеринде оланы тренери Зубайыр Магьамматовну аслам пайы бар. Ону къаныгъывлу загьматы булан олар лицейни чи нечик де, савлай район­ну да абурун оьр этелер.

Аскер Амангишиевге гележекге не йимик умутлары ва  муратлары  барны сорайман.

– Бугюнлерде лицейни тарыгъына юрт администрацияны янындан 1 гектар топуракъ гёрсетилген, – дей Аскер Тавсолтанович. –  Шону айланып сетка тутуп бегитмек муратда район администрацияны янындан акъча да гёрсетилген. Ювукъ арада шо майдангъа емиш тереклер орнатма болушлукъ этежек. Шо ишлер охувчу яшланы, сынавлу муаллимлени илму-ахтарыв ишге къуршамагъа болушлукъ этежек. Неге тюгюл де, яшлагъа янгыз билим берип тургъан булан болмай, оланы билимин мекенли ишде къоллавну гьайын да этмеге герекбиз. Шо ишде школаны баву бизге хыйлы кёмек этежекге шеклик этмеймен.

Адам загьматда чыныгъагъаны къайсыбызгъа да белгили. Муаллимлеге де загьматында етишген уьстюнлюклерине гёре къыймат бериле. Оланы ишини натижасы билим ва тарбия береген охувчуларындан таба аян бола. Лицейни муаллимлерини арасында загьматгъа байлангъанлы 40 йыллардан оьтгенлери де бар. Касбу ёлунда олар яхшы натижалар гёрсетип чалышалар. Оланы арасында орус тил ва адабият дарсланы, башлапгъы класланы муаллимлери Юлдузат Элешовна Гьажиабдуллаеваны ва Шагьаржат Агъаевна Ногьманованы, сынавлу педагогу Солтанат Арсланалиевна Атаеваны эсгерме тюше. «Умуми билимлени гьюрметли къуллукъчусу» деген атны алгъан  Кавсарат Абдурагьмановна Ногьманова, Испаният Умалатовна Къожакъова, Зайырахан Шайыховна Марданова, Марзият Жамалдиновна Дайибова йимик муаллимлер де макътавгъа лайыкълы. Олар охувчулагъа мугькам билимлер бермек муратда чалышалар ва оьзлени къайратлы загьматы булан иш ёлдашларыны ва охувчуларыны янындан абур-сый къазангъанлар.

Сынав йыллар булан топлана дегенлей, школаларда кёп йылланы боюнда загьмат тёгюп тургъан муаллимлер охувчуланы нечесе наслусун яшавгъа ругьландырып йиберген экен? Муна Мужукъай школада шолай, ата-ана булан тыгъыс байлавлукъда яш наслуну тарбиялавну да, билим беривню де ветеранлары Кабахан Сулеймановна Стамбулованы, Абдурагьман Къурманаевич Ногьмановну, Абдулгьаким Сираждинович Кумаковну, Дагьир Къурманаевич Ногьмановну, Нюржанат Маматовна Рамазанованы, Ума Мустапаевна Кумакованы атларын айрыча эсгермеге ярай. Олар  билим берген ва тарбиялагъан яшлар яшавда оьз ерин табып, республикада ва ондан тышда да ишлейлер. Оланы арасында Къызлардагъы экстремизмге къаршы иш гёреген центрны къуллукъчусу Алибек Гьабибов, Магьачкъаладагъы ахтарыв управлениени къуллукъчусу Магьаммат Ногьманов, Ханты-Мансийск автоном округунда хирург болуп ишлейген Сослан Кумаков, ГИБДД-ни къуллукъчусу, полицияны сержанты Кърымхан Давутов, участка инспекторланы ёлбашчысы Магьмут Абдулманапов, Белоярск шагьарны МЧС-ини ёлбашчысыны орунбасары Арслан Кумаков ва олай нечеселери чалышалар.

Мужукъай агротехнология лицейде оьз ишине жаваплы янашагъан, танглагъан касбусуна амин болуп чалышагъан яш касбучулар да бар. Дагъыстан пачалыкъ педагогика университетни лап яхшы къыйматлагъа тамамлагъан, буссагьатгъы вакътиде ишинден айырылмагъан кюйде  магистратурада билимлерин камиллешдиреген ва физика-информатика дарсланы юрютеген Элдар Дайибов, эсгерилген охув ожакъны тамамлагъан математика дарсланы муаллими Исмайыл Гьажимавов йимик уланлар макътавгъа лайы­кълы. Олар дарсларда гьар тюрлю билим берив къайдаланы къоллап, охувчулагъа терен билимлер берме къастлылар.

Агротехнология лицейни директору Аскер Амангишиев эсгерген кюйде, 2016-нчы йылда  юртда янгы школа къурулуп башлажагъына умут этелер. Бугюнге школаны  кюрчюсю де гьазир. Ол билдирген кюйде, шо иш районну ёлбашчыларыны тергевюню тюбюнде ва янгы школаны ачылыву булан лицейде билим берив янгы даражагъа чыгъажагъына бир де шеклик этмей. Бизге буса Мужукъай агротехнология лицейни муаллим коллективине ишинде оьрлюклер, савлукъ, насип ёрамакъ къала.

 

 

А. Хамавова.

Бабаюрт.

Суратда: Мужукъай агротехнология лицейни коллективи.

Авторизация
*
*
Регистрация
*
*
*
Согласны с условиями сайта?
Генерация пароля