Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Йырчы Къазакъ арабызда яшай

Йырчы Къазакъ арабызда яшай


Дагъыстанны халкъ шаири Шейит-Ханум Алишева Йырчы Къазакъгъа багъышлап язгъан шиърусун чебер кюйде охуп, бу байрамны ачды ва юрютдю.

–Хошгелдигиз, барыгъыз да. Магъа бугюн барыбызгъа да ортакъ тилде сёйлеме тюшежек,–деди ол. –Неге тюгюл де, шаирибизни гюнюн белгилеме республикабызны бары да миллетлерини вакиллери: шаирлер, язывчулар, алимлер гелген. Биринчилей сёз берме сюемен Дагъыстанны язывчуларыны союзуну правлениесини председатели, Дагъыстанны халкъ шаири Магьаммат Агьматовгъа.

–Гьюрметли къурдашлар, гьаманда йимик, язбаш бизин классигибиз Йырчы Къазакъны эсделигини алдында башлана,–деди ол. –Бу гезик де биз зор пагьмусу булангъы Йырчы Къазакъгъа ва ону миллетине ­оьзюбюзню абурубузну, сыйыбызны, сюювюбюзню гёрсетме жы­йылгъанбыз. Герти шаирни къысматы гьар заманда да халкъыны къысматы булан байланып геле. Неге тюгюл де, шаир халкъыны къыйынын-тынчын оьзюню юрегинден оьтгерип яшай. Йырчы Къазакъ да оьзюню халкъыны къысматын бир де оьлмежек ва унутулмажакъ оьзюню шиъруларына салып юрюген. Ону яшаву, къоччакълыгъы, эркинликге талпынагъан юреги яш наслугъа уьлгю болуп турма герек. Къазакъгъа тюзлюкню айтма, халкъыны къыйын гьалын гёрсетме бирев де пуршав этме болмагъан. Тюзлюк учун ол кимбилди этилип оьлюп де гетген. Оьзю гетсе де, ол къоччакълыкъгъа, тюзлюкге чакъырагъан, бизин халкъны ругьландырагъан шиърулары булан адабиятда да, бизин арабызда да яшай ва яшажакъ.

«Ёлдаш» газетни баш редактору Камил Алиевге сёз бериле.

–Йырчы Къазакъны поэзиясыны гюнюн гьар йыл май айда оьтгерегеник мердешге айланып битген. Ол бизин арабыздан гетсе де, халкъыбызны сырдашы, къурдашы, ойдашы болуп бизин булан яшай. Нечесе наслулар ону шиъруларындан сююнюп, къуванып, ону язгъанларындан ругьланып гелген ва гележек. Шу гюнге байлавлу биз адатлы кюйде къумукъ илму-маданият жамиятыбызны медалларын тапшурабыз. 16-нчы майда болгъан жыйыныбызны 9 номерли къарары булан бу йыл медаль дёрт адамгъа тапшурула. Шо сыйлы къуллукъну кюте туруп мен оланы мунда чакъыраман:

Латип Гьайбуллаевич Гьажакъаев, «Плаха» деген Йырчы Къазакъны къоччакъ яшавуна ва яратывчулугъуна багъышлангъан оьр чеберлиги булангъы поэмасы учун;

Буйнакск районну Атланавулундагъы Йырчы Къазакъны атындагъы гимназияны завучу, ана тилден дарс береген муаллими Якъут Дайитбековна Аселдерова, «Судьба и поэзия Йырчы Казака: историко-литературный комментарий» деген илму-ахтарыв иши учун;

Магьтибек Шарабутдинович Магьтибеков, скульптор, Атланавулда Йырчы Къазакъгъа салынгъан эсделикни этгени учун;

Капиркъумукъдагъы орта школаны муаллими Абугьанипа Даниялович Акаев, Йырчы Къазакъны яшавун ва яратывчулугъун ахтарып, халкъ арада яйывда этген оьз къошуму учун.

Барыгъызны да къутлайман.

Ондан сонг профессор Абдулгьаким Гьажиев, Дагъыстанны халкъ шаири Агьмат Жачаев, жамият чалышывчу Абсалитдин Мурзаев, Дагъыстанны язывчуларыны союзуну бары да милли секцияларыны ёлбашчылары чыгъып сёйледи. Медаль алгъанлар Абугьанипа Акаев, Якъут Аселдерова, Латип Гьажакъаев оьзлеге этилген абур-сый учун баракалла билдирди. «Ёлдашны» мухбири Алав Алиев де Йырчы Къазакъны оьзю орусчагъа гёчюрген бир шиърусун чебер кюйде охуду.

Сёйлевлер булан аралашдырып, Атланавулдан гелген агъачкъомуз согъагъан яшлар, гимназияны охувчулары, Къаягент райондан агъачкъомуз согъуп йырлагъан Магьамматрасул Пашаев, Таргъу, Агъачавул, Къарабудагъгент, Къоркъмаскъала школаланы охувчулары чебер кюйде Йырчы Къазакъны шиъруларын охуп, жыйылгъанланы гёнгюн алды.

Йырчы Къазакъны поэзиясыны бу йылгъы гюню къурумлу кюйде, узакъ заман эсде къалардай оьтдю.



Я. БИЙДУЛЛАЕВ.

СУРАТЛАРДА: (оьрде) шаирибизни поэзиясыны гюнюнде ;

медальгъа ес болгъанлар .


Количество показов: 654
20.05.2016 10:41

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта