Ол – Марат Акъаев. 1987-нчи йылда Янгы Солакъ деген посёлокда тувгъан. Ата-бабалары Темиравул юртдан чыкъгъан. Анасы чагъаротарлы.
Марат Солакъ посёлокдагъы 5 номерли школада охуйгъан йылларындан тутуп, ерли музыка школагъа юрюме башлагъан. Шо йыллар къомузну да къолуна биринчи керен алгъан.
Яш ва бек пагьмулу аргъанчы булан ёлугъуп лакъыр этемен.
– Марат, сен телевидениеден аргъан согъагъан кюйню гёрюп: «Я, шу чу къумукъ улан», – дейгенлени кёп эшитгенмен. Къаравчулар сен согъагъан макъамланы бек ушаталар. Сени аргъан сокъма ким уьйретген?
– Аллагьгъа шюкюр, къумукъман. Мен согъагъан макъамланы эшитгенлерден магъа кёп телефон сёйлейгенлер де болду. Олардан исси сёзлер ва макътавлар да эшитдим. Аллагь рази болсун олагъа. Мени тынглавчуларым ушата болгъан сонг, мен олар учун согъажакъман. Аргъан сокъма мени бизин посёлокда яшайгъан музыкант Ваха уьйретди. Музыка школада буса мен аккордеон сокъма уьйрендим. Сонг, аста-аста аргъангъа чыгъып къалдым. Анам Нюргьият мен аргъан сокъгъанны сюе эди. Башлапгъы йылларда магъа Къайырхан деген аргъанчы кёп кёмек этди. Сонг мен аргъанчылар Батыр Апаев, Шамил Исаев ва аты айтылгъан аргъанчы Бектемир Абдулхалыкъов булан таныш болдум. Олар аргъан согъагъан кюйню бек ушата эдим. Олар мени де кёп макъамлар сокъма уьйретди.
– Аргъан булан башлап не кюйлени сокъдунг?
– Биринчиси – «Ёл», экинчиси Зоя Чунаеваны «Амалларыма» деген йырны кюю эди.
– Марат, сен къайсы кюйню де алып согъуп къоямысан?
– Сокъмайман. Мен макъамланы сайлап алып, олагъа оьзюмню янымдан бир тюрлю толумлашдырывлар этемен, айрокъда къумукъ халкъ кюйлени уста кюйде сокъма къаст этемен.
– Сен аргъанны согъагъанда бармакъларынг перделеге чалт-чалт басагъан кюйню гёрюп, тамаша болагъанлар бар.
– Олай чалт сокъма бир айдан уьйренип къалмай. Мени аргъан согъагъаным 15 йылдан да артыкъ бола. Аргъан согъув тынч иш тюгюл. Согъагъанлар да аз тюгюл. Тек сиз де эсгерген шо бармакъларын уста кюйде ишлетегенлер аз бар деп эсиме геле. Ингдеси, къайсы макъамны да пагьмулу кюйде, адамны къулагъына арив чалынагъан, юрекге сингеген кюйде сокъма герек.
– Сизин агьлюде музыканы сюегенлер бармы?
– Атам Арсланали йырлагъа тынглама кёп сюе. Анам буса – мени биринчи тынглавчум. Аргъанны тавушун эпсиз кёп сюе. Иним Камилге 25 йыл бола, ол да арив теп согъуп бажара.
– Марат, сен къайда ишлейсен?
– Мен Хасавюртдагъы маданият центрда ишлеймен.
– Сени яратывчулукъ ёлунгда уллу уьстюнлюклер ёрайбыз!
– Савболугъуз!
Измулла ГЬАЖИЕВ.
Автор чыгъаргъан сурат.
