Яратывчулугъу халкъына багъышлангъан

Сонг Магьачкъалагъа гелип, Жамалны атындагъы Дагъыстан чебер училищеге тюшюп, шонда да ол сурат этив саниятгъа мекенли кюйде уьйрене. Асгерде къуллукъ этип къайтгъанда ону Атланавулдагъы школагъа сурат этив ва черчение дарсланы муаллими этип ала. Школада 10 йылдан да къолай заман ишлеп турагъанда, М. Магьтибеков усталыгъын ва билимлерин артдырма сююп, Москвадагъы педагогика университетни чебер факультетине тюше ва шону да уьс­тюнлю кюйде тамамлай. Онда охуйгъанда ол хыйлы белгили художниклер булан таныш бола.


Шондан бери якъгъа Магьтибек Шарабутдинович юреги алагъан касбусундан, демек, сурат этив ва скульптура ишден бир гюнге де айрылмагъан. Ону уста къолу булан кёп санавдагъы суратлар этилген, белгили адамланы эсделигине скульптура памятниклер къуюлгъан. Магьтибек этген памятниклени арасында Атланавулдагъы школаны алдына салынгъан Йырчы Къазакъны, белгили алим, муаллим, жамият чалышывчу М. Жамболатовну памятниклери, Оьр Къазанышда ва Халимбекавулда бу юртлу къоччакъ уланлар, Россияны Игитлери З. Давутовну ва А. Аскеровну ва башгъа памятниклери бар.


Бугюн ол – Дагъыстанны инчесаниятыны ат къазангъан чалышывчусу, Россияны художниклерини союзуну члени. Ол ­оьзюню яратывчу ёлунда 200-ден де артыкъ суратланы этген, бир нече художниклени де уьйретген.



Магьтибек Магьтибеков – пагьмулу художник ва рагьмулу адам. Атланавулда уллу ва татывлу агьлюню башы, абурлу тамаза. Ону уланларыны да атасы йимик чебер пагьмудан англаву бар. Уллу уланы Ибрагьим сурат этив саниятны ёлунда бажарывлу кюйде чалыша. Ол да чебер училищени битдирген, художник гьисапда белгили болгъан. Буссагьат ол дизайн-студияны ёлбашчысы. Бирдагъы уланы Жамал оьзюню пагьмусун спорт якъдан гёрсетген, жая булан окъ атышывну Дагъыс­тан федерациясыны президенти. Магьтибек Шарабутдиновични уланыны уланы Мухтар буса – режиссёр, бир нече киноланы чыгъаргъан.


Алдагъы гюнлерде Буйнакскидеги тарихи-крайны уьйренив музейде М. Магьтибековну суратларыны выставкасы ачылды. Шо гюн мунда кёп къонакълар: ону къурдашлары ва ата юртлулары да гелди. Выставканы ачылывуна багъышлангъан «Инчесаниятны поэзиясы» деген байрамгъа гелгенлер биринден-бири алып, сагьнагъа чыгъып, художникни атына ла­йыкълы сёзлер айтдылар, ону гьакъ юрекден къутладылар, выставканы оьтгеривню сиптечилери болгъан ёлдашлагъа баракалла билдирдилер. Белгили йыравланы къурч сарынлары, агъачкъомуз согъула туруп айтылгъан бырынгъы къумукъ йырлар, Атланавулдагъы инчесаният школаны охувчулары гёрсетген бийивлер, «Байтерек» деген хорну йырлары, Магьтибекни яшларыны яшларыны лап гиччилери уллатасына багъышлап айтгъан шиърулар залгъа жыйылгъанланы гёнгюн ачды.


Сонг оьзю Магьтибек Магьтибеков ва ону уллу уланы Ибрагьим выставканы ортакъчыларына, бары да ишин къоюп бугюн шунда гелгенлеге, гьакъ юрекден разилик билдирдилер.


– Пагьмулу адамланы яшаву бюс-бютюнлей оьз халкъына багъышлана. Шу уллу чагъымда булай выставкалар эте турмасман деп ойлашсам да, бир нече ёлдашлар шу ишни агьамиятлы­гъына мени мюкюр этди. Булай уллу залда мени суратларым салынагъаны – бу экинчи керен. Аллагь савлукъ ва гюч берсе, энниден сонг да бизге шулай ёлукъма насип болар. Савболугъуз! – деди М.Магьтибеков.


Магьтибекни выставкасыны ачылывуна гелгенлер музейни уллу залыны дёрт де янына илинген ва ону къолу булан гьар тюрлю йылларда этилген 75 суратына къарап чыкъдылар. Суратланы арасында художникни ата юртуна, савлай Дагъыс­танны табиатына, айлана якъны гёзеллигине багъышлангъанлары аслу ерни тута. «Янгурдан сонг», «Къызылъяр», «Шавхалны таву», «Гунибге багъып ёл» деген ва башгъа суратлар ренки булан да, маънасы булан да тергевюнгню тартмай болмай. Тёр якъдагъы дагъы да бир нече суратлар буса бизин районда яшагъан белгили адамланы келпетлерин эсге сала.

Гь. ГЬАЙБУЛЛАЕВ.


СУРАТЛАРДА: М. Магьтибеков; къаравчулар выставкада.

Авторизация
*
*
Регистрация
*
*
*
Согласны с условиями сайта?
Генерация пароля