Яхшы ёл, Элина!

Айтагъаным, ону таъсирини даражасында тергев де герекдир. Буссагьатгъы вакътиде бизин дарс беривчюлеге жамиятны тергевю тарыкъ даражада етип битмеген буса  да, намус, ягь булан ишлейген, халкъ арада абур-сый къазангъан муаллимлени  таъсири булан  яшёрюмлер охув ожакълагъа барагъаны бизин сююндюрмей болмай. Бу йыл Борагъан орта  школаны 11-нчи класын лап оьр къыйматлагъа битдирип, Грозныйдагъы пачалыкъ университетини биология факультетине уьстюнлю кюйде экзамен де берип, охумагъа тюшген хоншум Элина Контаева булан охувчуланы таныш этмеге сюемен.

– Элина, муаллим касбугъа охума баргъанынгны кёп яхшы гёремен, ер юзюнде  ондан сыйлы касбу ёкъ. Уллатанг да белгили муаллим, сабур-саламат адам эди. Ону да таъсири болгъандыр, – деймен.

– Озокъда, уллатамны таъсири де болду. Ондан къайры да, школада охуйгъан заманда да биология дарсланы сюе эдим, – дей ол.

– Яшланы да сюесендир? – деймен.

– Озокъда, сюемен. Яшланы сюймейген адам боламы?

 Сонг да, яшав не кюйде де алышына тура, иш ерлер де ёкъ. Биология факультетни битген адам, школада иш ер болмай къалса, курслардан оьтюп, врач-лаборант болуп ишлеп болагъанны да гёз алгъа тутгъан эдик, – дей Элина.

– Тюз айтасан, Элина. Муаллим де, доктор да – жамиятгъа инг башлап тарыкъ касбулар. Муаллим билим, тарбия бере буса, доктор наслуну  савлугъун болдура, барлай. Тек бу эки де касбуну сюеген адам лап оьр къыйматлагъа охумагъа да борчлу. Олагъа ишде хата йибермеге ярамай. Неге тюгюл, инсандан сыйлы дюньяда гьеч зат ёкъ ва болмагъа да тюшмей. Докторланы хаталары къабурланы безей, муаллимлени хаталары яшавда гезей дей халкъ ою. Шо уллу иш тюз ой да дюр. «Юз яша – юз оху!» – дейген халкъны ваъзасы буса, Элина, башгъа бары да касбучулардан артыкъ бу эки касбугъа къыйыша, – деймен.

– Билимге уллу иш гьасиретмен, охужакъман! – дей инамлы кюйде ол.

– Муна шо яхшы. Университетни ошатдынгмы?

– Университет – уллу иш гёзел. Герек-тарыкъ бары да заты бар. Ингдеси, муаллимлери студентлеге тергевлю, лекциялары тутумлу, охувда уллу иштагь  тувдура, – дей Элина, сююне туруп.

Биз де огъар гьакъ юрекден: «Сююне яша, къаныгъывлу охуп, насипли бол, муратларынга етмеге Тенгирибиз къуват берсин!» – дейбиз.

 

 

Абас Мамаев.

Мычыгъыш Республика, Борагъан.

суратда: Э.Контаева.

Авторизация
*
*
Регистрация
*
*
*
Согласны с условиями сайта?
Генерация пароля