Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Уьстюнлюкню гюнюне багъышлангъан сатырлар...

Уьстюнлюкню гюнюне багъышлангъан сатырлар...

Анвар Гьажиев,

Дагъыстанны халкъ шаири

 

 

Сёнмейген юлдузлар

(Къысгъартылгъан)

 

Волгадай генг, Дондай юваш дангыллар,

Йыр сатырлар йимик харчлар безеген.

Гётерилген гёк тютюнлю трубалар

Ракетлердей юлдузлагъа гёзленген.

 

Бу якъларда къаракъушлу тавлар ёкъ,

Тав багьасы – Мамай курган тёбе бар.

Шо тёбеге мен тавлардан гюн элтдим,

Шо тёбеге сен гюл-чечек себе бар.

 

Шо тёбеде сынташлагъа сюрюнюп,

Сынтыкълайгъан сыры гючлю ел йылай.

Уланларын басгъан кюйде бавруна

Уьлюшю кёп ойлу Ана–Ер йылай.

 

Мамай курган–яшмынлы чакъ, яслы той,

Наслуланы назмусу нарт эрлеге.

Уьстюн ону оьртген къайнар къургъашын,

Аякъларынг бише бассанг ерлеге.

 

Шо тёбеден юлдузлагъа къарасанг–

Яна, сёне, уча кёкде бирлери.

Курган тюпде олар сёнмей, йыртыллай,

Болмаса да гёзлеринде нюрлери.

Шарип Албериев

 

Хохол

этиклер

 

Мююшге тизилген хохол этиклер,

Булар кёп ерлени гёргени герти.

Есибиз булан биз нелер этдик дер,

Чечме тюшсе, нагагь, къыйынын-дертин.

 

Кёп ёл этген булар Кавказда тувуп,

Ултаны ашалгъан, тюслери онггъан.

Буланы йибитген Эдилни суву,

Булагъа Брестни чангы да къонгъан.

 

Яллавда багъырдай къызма да къызгъан,

Сувукълар къурутуп мююздей болгъан,

Гюлле яркъыч бирин гьызма да гьызгъан,

Онг аякъдагъы къангъа да толгъан.

 

Халкъны къутгъармагъа гитлерчи хачдан

Балтика бойларда батмакъгъа батгъан,

Чырмавлар чырмагъан румын къумачдан,

Берлинни тюбюнде окопда ятгъан.

 

Бу къоччакъ этиклер оьтген къайдан да,

Таптап от-ялынны сёндюрген гьатта,

Уьстюнлюк гелгенде Къызыл майданда

Ортакъчылыкъ этген булар парадда.

 

 

Камил Султанов

 

 

Къуванч гюнлер

(Лейтенант Юсуп Жанакъаевни эсделигине)

 

Яш уланлар якъ-ягъына чачылып,

Къаршылашдыкъ къагьрулу замангъа.

Жаныбыздай хыйлы азиз дослардан

Айырылма тюшдю бизге гьамангъа.

 

Эсге гелген сайын, юрек къысыла,

Уьйлю-уьюне олар дагъы къайтмажакъ.

Инбашынга къолун салып къучакълап,

«Къурдашым» деп бал татытып айтмажакъ.

 

Къыдырмажакъ сени булан алдындай,

Бирге ойнап, бирге оьсген ерлерде,

Шолай дагъы аталаны адаты:

Къыйынлы гюн Эл намусу эрлерде.

 

Ватан учун жанын берген уланлар

Буссагьат да олар бизин буланлар.

Яныбызда гьар гюн де ва гьар гече де

Биз оланы унутмасбыз оьлгюнче.

 

Къуванч гюнлер къайтып гьали бериде.

Игит совет армиялар – Берлинде!

Эркинликни алып олар гелгенлер.

Бир заман да эсибизден таймажакъ

Шу уллу гюн учун давда оьлгенлер.

1945 й.

 

Магьаммат-Наби Халилов

 

Гюмез ташлар

 

Хоншубузну тамлагъына таянып,

Арсланлардай арып къайтгъан авлардан,

Авур ташлар–гюмез ташлар бар эди,

Бир заманлар чыкъгъан ташгъын сувлардан.

 

Эсимде бар шо ташларда олтуруп,

Эсги солдат шинел гийген эренлер

Давну пашман хабарларын айтгъаны,

Бизге, оьрюм яшлагъа, кёп керенлер.

 

Тюшлеримде–тезден шинел гийгенлер...

Ташлар да ёкъ, барма юрек талчыкъда:

Дамагькарлы хоншум алып оланы

Чыргъа ишлеп къойду, сылап балчыкъ да.

 

Оьте бусам шо тамлакъны алдындан,

Абатымны алгъа гьаран аламан...

Минг макътавлу атолларын авулну

Ёкъ ташлагъа тизе туруп къаламан.

 

Багьавдин Моллаев

 

 

Анам

 

Атамны алып гетди бизден оьртен дав,

Айланада энни арив шат яшав.

Атам мени давгъа гетип къайтмагъан,

Тюшлеримде къайтып геле саппа-сав.

 

Аналагъа авур болду нече де

Авлетлени тургъузмагъа аякъгъа.

Яланаякъ бичен чалдыкъ, баш жыйдыкъ,

Аякъланы кёп гесдирдик къыякъгъа.

 

Ачлыкъ къыйнап алабота ашадыкъ,

Атам къайтмай, ажжал бизин алмас деп.

Биргине-бир умут булан яшадыкъ,

Насип болса, атам къайтмай къалмас деп.

 

Вай нечакъы умут этип турсакъ да,

Умутлар да къайтармагъа болмады.

Кёп йыл гетди...атам къайтып гелер деп,

Умут этме умутум да къалмады...

Количество показов: 438
15.05.2014 10:17

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта