Унутулмайгъан адамларыбыз

Гьар адамны оьз пагьмусу бола. Тек шо пагьмуну аян этме тынч тюгюл. Ким бола­йым, не касбугъа ес болайым? Эрте-геч бу соравлар гьар адамны да алдында токътай. Гьар ким оьзюню юреги алагъан касбуну да танглай. Юреги алагъан касбуну башын тутгъанлар буса насипли адамлардыр.

Муаллим, тарбиялавчу, насигьатчы– касбу тюгюл, шо – адамгъа берилеген пагьму. Оьзю муаллим болуп яралгъанын англап битмей, башгъа касбуну юрюте туруп, сав оьмюрюн йибергенлер де бар. Муаллим болма тийишли тюгюл, тек бу касбуну юрютегенлер де бар. Дюньягъа аты белгили язывчубуз Лев Толстой муаллимни гьакъында булай язгъан: «Муаллим оьзюню ишин сюе буса, ол яхшы муаллим. Муаллим охувчуну ата-анасы йимик сюе буса, ол бары да китапланы охугъан, тек не ишине, не охувчулагъа сюювю ёкъ муаллимден яхшы болажакъ. Тек муаллим оьзюню касбусун да, охувчуланы да сюе буса–ол герти муаллим».

Нечик тюз сёзлердир. Муаллимни касбусу къыйын касбу да дюр, рагьмулу ва сыйлы, кёп пайда гелтиреген касбуланы да бириси. «Бир елевчю де, бир пачалыкъ чалышывчу да халкъны кюрчюсюн, англавун алышдырма болмай. Тек муаллим олардан эсе кёпню этип бола. Муаллимлер ойгъа, хыялгъа гелтире, адамны яшыртгъын гючюн, пагьмусун ачып бола»,–деп язгъан Н.Рерих.

Дагъыстан Республиканы Башчысы Рамазан Абдулатипов да муаллимлени август жыйынында: «Муаллим дагъыстан жамиятны яшавунда маъналы ва тарихи роль ойнай. Дагъыстанны гележеги школаны ишинден гьасил болажакъ. Гьар тюрлю къыйынлы гьаллагъа да къарамай, муаллим гьар заманда да халкъ муаллими кюйде къалажакъ»,– деп айтды.    

Муаллимни де, охувчуну да аралыкълары бир йимик тенг болма бажарылмай. Муаллим – сынавлу, йыллагъа уллу. Тек оланы аралыкълары бир тенг, юрек бирликде болма тюшегени де ачыкъ. Охувчу муаллимден эсли къурдашын ва насигьатчысын излей.

Шону англап, огъар къол ялгъап, ёл гёрсетип болгъан муаллим охувчуну сююмлю муаллими болуп бола.

Халкъ арада муаллим оьзюн тутагъан, сёйлейген кюю, гьар тюрлю гьаллагъа гёре тюз гьасил чыгъарып болагъан кюю, гертилиги, гьакълыгъы охувчуну эсинде даимге къала. Охувчу муаллиминден уьлгю алмагъа къаст эте.

Мени наслум эсли наслу буса да, школа чагъыбызда биз оьзлерден уьлгю алгъан муаллимлер эсибизден таймай. Гьар тюрлю къыйынлы яшав гьаллагъа тюшгенде, «мени муаллимим нечик этер эди?» деген соравну къайсыбыз да оьзюбюзге аз бермегенбиз. Неге тюгюл, ата-анангдан сонг сагъа тарбия берген, билим берген адам – муаллиминг. Ол унутулмайгъан адам. Гьарибизни пагьмубузну, бажарывлугъубузну аян этген, арагъа чыгъаргъан адам.

Республиканы Башчысы оьзюню шо жыйында сёйлевюнде: «Пагьмусуз яшлар ёкъ. Пагьмулу муаллим етишип болгъан бары да охувчулар пагьмулу. Биз Дагъыс­танны гележегине жавап беребиз. Шону учун яратывчулукъ ишге къуршалма герекбиз»,–деди.

Янгы охув йыл. Янгы умутлар, хыяллар. Халкъ учун, жамиятыбыз учун пайдалы ва къыйын ишигизде, даим эсде къалагъан, унутулмайгъан адамларыбыз, муаллимлер, сизге уьстюнлюклер ёрайбыз.



Яраш Бийдуллаев,

маданият бёлюкню редактору.

Авторизация
*
*
Регистрация
*
*
*
Согласны с условиями сайта?
Генерация пароля