Уллу алимни эсделигине

«Кавказны этнографиясы ва совет девюрде юрюлген ахтарыв иш» деген темагъа багъышланып юрюлген конференцияда РАН-ны Н.Н.Миклухо-Маклайны атындагъы этнология ва антропология институтуну оьр илму къуллукъчусу, тарихи илмуланы доктору Ю.Анчабадзе, Азербайжанны милли илмулар академиясыны археология ва этнография институтуну илму къуллукъчулары, философия илмуланы докторлары Г. Шагьбазов ва П. Исма­йыл-заде,

тиллени уьйренеген Азербайжан университетини кафедрасыны ёлбашчысы С. Алиева,  РАН-ны  илму-ахтарыв институтуну этнология ва археология лабораториясыны ёлбашчысы С. Жанмирзаев, Майкопдагъы пачалыкъ технология университетни тарих ва ихтиярлар кафедрасыны ёлбашчысы С. Кудаева ва оьзге ёлдашлар ортакъчылыкъ этди. Умуми алып айтгъанда, тышдан гелип конференцияда доклад этген къонакъланы санаву 10-ндан да артыкъ эди.

Халкъара конференцияда арагъа салынып ойлашылагъан масъалаланы гьакъында айта туруп, Дагъыстан илму центрны илму-ахтарыв институтуну этнография бёлюгюню ёлбашчысы Магьамматхан Магьамматханов шону ачды ва юрютдю. «Профессор С. Гьажиеваны яшаву ва илму ёлу» деген темагъа гёре илму-ахтарыв институтуну баш илму къуллукъчусу, тарих илмуланы доктору Барият Алимова чыгъып док­лад этди. Ол С. Гьажиеваны илму булан машгъул болмагъа башлагъан йылларына залда олтургъанланы аслу тергевюн бакъдырды.

– Сакинат Шихагьматовна къумукъланы тарихин ахтарывда гьали болгъанча арагъа чыгъып белгили болмагъан маълуматланы халкъына къоюп гетди. Ону «Кумыки», «Очерки истории семьи и брака у ногайцев», «Дагестанские терекеменцы», «Женщины советского Дагестана», «Дагестанские азербайджанцы» деген ва оьзге илму китапларындан пайдаланагъанланы санавун оьлчемеге де къыйын, – деди ол.

Халкъара конференцияны барышында «XIX ва  XX юзйылны башында Азербайжанны ва Дагъыстанны арасындагъы этномаданият байлавлукълар», «XX асруну биринчи яртысында Азербайжанны этнографиясыны оьсюв ёллары» деген ва шолай да этнография булан байлавлу оьзге темалагъа ба­гъышланып докладлар этилди. Аслу док­ладлар охулгъан сонг конференцияны ортакъчылары эки секциягъа бёлюнюп ишин узатды. Биринчи секцияда «Этнография ахтарывланы теориясы ва методологиясы» деген теманы айланасында сёз юрюлдю. Экинчи секциягъа бёлюнген алимлер буса Кавказда демографиягъа, этномаданиятны тарихине ва оьсювюне багъышлангъан масъалалагъа къарадылар.

Артындагъы гюн, октябр айны 25-нде, «Маданиятны ва яшав-туруш гьалланы модернлешдиривде этнография ишлени юрютювню оьзтёречелиги» деген темагъа гёре «дёгерек столну» айланасында пикру алышдырыв оьтгерилди.

 

Б. ОЬЛМЕСОВА.

СУРАТДА: конференциядан гёрюнюш.

Авторизация
*
*
Регистрация
*
*
*
Согласны с условиями сайта?
Генерация пароля