Шолардан тюз пайдаланып билсе, дюнья оьлчевюндеги англавланы тез ва мекенли кюйде камиллешдирмеге, кёпню сырларын гёрюп, охуп, гьазир тюшюнмеге, дюньяны олтургъан еринде тез эллеп чыкъмагъа, кёп тюрлю маълуматлар алмагъа боласан.

Муна гьали-гьалилерде районда башлапгъы класларда дарс береген муаллимлер «Охув гьаракатны гьар тюрлю ёлларында ва ёрукъларында компьютер технологияны къоллав» деген темагъа гёре Бугленде Ш. Шихсайитовну атындагъы школагъа семинар дарсгъа жыйылгъан эдилер.

Жыйынны ачып сёйлей туруп, райондагъы билим берив управлениени методика кабинетини заведующийи Рукъият Набиева булай деди:

– Школаларда янгы технологияланы къоллайгъанлыкъ дарс беривчюлер учун онгайлы геле. Муаллимлени иш кютеген къайдасын мугькамлашдырма, онгача билимлерин теренлешдирме, дарслардан сонггъу вакъти оьз-оьзюню билим даражасын оьрге гётермеге болушлукъ эте…

Семинарлыкъ дарсны барышында Буглен школаны муаллимлери, интерактив досканы, проекторну, компьютерни къоллап, ачыкъ дарслар оьтгерди. 1-нчи класда муаллим Солтанат Бийболатова айлана якъны (табиатны) гьакъында дарсны юрютген кюйге эки якъдан гелген муаллимлени бек кепи гелди.

3-нчю класдагъы Мадина Алхасова орус тил дарсны Интернетни къоллап юрютдю. Ол малим этеген маълуматлагъа яшлар бек муштарлы кюйде тынгладылар.

Дарслар яшланы гьакъыл, пикир гьюнерлерин, гьасил чыгъарыв пагьмусун оьсдюрювге багъышлангъан эди. Мундагъы семинарлыкъ дарслар оьр методика даражада оьтдю. Эки якъдан гелип дарсгъа къарагъан муаллимлер оьзлер учун кёп пайдалы янгылыкъланы билдилер ва гёрдюлер.

 

 

 

 

 

 

 

 

 

Абдулла ЗАЛИМХАНОВ.

Суратда: Буглен школаны муаллими Солтанат БИЙБОЛАТОВА ачыкъ дарсны юрютеген вакъти.