«Тили сакъланмаса, халкъ да яшамас»

Озокъда, журнал оьзлюгюнден болуп къалмай. Ону шо оьр даражагъа чыгъарма гьай этегенлер де, яшланы гьалын-гюнюн, дюньясын англайгъанлар да болма тарыкъ чы. Айтагъаным, «Къарчыгъа» журналны редактору, Дагъыстанны халкъ шаири Шейит-Ханум Алишева ва экинчи редактору Патимат Абдуллаева яшланы назик юреклерине таъсир этсин, къужурлу болсун деп нече тюрлю ёлланы излеп, янгы­лыкълар таба. Гьатта огъар язылагъанланы, ону булан къатнайгъанланы иштагьландырмакъ учун да гьар тюрлю чаралар оьтгерелер. Айтагъаным, бираз алда оланы къасты булан Магьачкъаладагъы ва шагьаргъа ювукъда ерлешген – Таргъу, Агъачавул, Къоркъмаскъала ва оьзге школаланы охувчулары, муаллимлери, гёрмекли маданият, жамият чалышывчулар, шаирлер, язывчулар булан Дагъыстанны язывчуларыны союзундагъы Р. Гьамзатовну музейинде ана тилге ва журналны чы­гъагъан кююне багъышлангъан бек пайдалы ёлугъув болду. Шо ёлугъувну Дагъыстанны язывчуларыны союзуну председатели Магьаммат Агьматов гиришив сёз булан ачды. Ол оьзюню агьамиятлы сёйлевюнде булай эсгерди:

– Тили сакъланмаса, халкъ да яшамажакъ. Шону учун да, сизин рагьмулу якълавугъуз, янашывугъуз болмаса, бизге шо масъаланы яшавгъа чыгъарма бажарылмажакъ. Ана тилни оьсдюрмек, ону узатмакъ учун «Къарчыгъа» журналны башын тутгъанлар бек гьайын этегенни гёрюп турабыз. «Къарчыгъагъа» язылгъанланы санаву бу йыл артгъан, 3 мингге етише. Сизге журнал ва бизин булан аралыкъ тутмакъны ёрайман.

Ону сёйлевюнден сонг, «Къарчы­гъаны» редактору Шейит-Ханум Алишева гьар йыл журналгъа жаны авруп языла-гъанлагъа гьюрметлев грамоталар тапшурду. Ол халкъны къысматына, адабиятына, маданиятына рагьатсызланагъан, къайда да, не ерге де етишип, гьар тюрлю агьвалатларда ортакъчылыкъ этеген жамият чалышывчу Разия Исаевна Жанболатовагъа да баракалла билдирип,  Дагъыстанны язывчуларыны союзуну ва къумукъ секциясыны атындан гьюрметлев грамота берди. Сонг ана тилни, адабиятны оьсювюне уллу къошум этегени ва гьар йыл коллективи язылагъаны  учун  «Ёлдаш» газетни редакциясын да гьюрметлев грамота булан савгъатланды. Ахырында буса гьар ерден гелген охувчу яшлар шаирлерибизни шиъруларын, биринден-бири алып, чебер кюйде охуп, жыйылгъанланы бек ругьландырдылар. Булай мердешленген ёлугъувлар, энниден сонг да Дагъыстанны районларыны школаларын да къуршап, уллу байрам йимик оьтгерилежек.

 

 

Авторизация
*
*
Регистрация
*
*
*
Согласны с условиями сайта?
Генерация пароля