Тар сокъмакъдан – шагьра ёлгъа!

Республикабызны билим берив ва илму тармагъына къарайгъан минис­терлиги ва Буйнакск районну админист­рациясы бу гезикли генгеш-семинар ортакъчыларына пайдалы болсун деп агьамиятлы иш юрютгени гьис этилине.

Школаны абзарында гелеген къонакъланы яшлар этген уча­гъан самолётларыны табуну къаршылай. Оланы оьз къолу булан тизген яш пагьмуланы шат юзю ва леззетли гьислери толкъунлардай биревден-биревге гёче. Тастарлар согъагъан, роботлар ва техника булан машгъул болагъан, уьйню ичиндеги ва тюрлю-тюрлю къуралланы безендиреген, чиш ва къармакъ булан согъагъан, увакъ минчакълар булан иш гёреген, хали-халча согъагъан, йырлайгъан, бийийген, къомуз согъагъан, сурат этеген пагьмулар оьзлер етишген даражасын гелгенлени де къуршап гёрсетме бажардылар.

«Гьар девюрге де – асиллик хазна» деген стенд-китап да къонакъланы тамашагъа къалдырды. Ону бетлериндеги «Нечик адам абургъа лайыкълы?», «Адамны языкъсынма, ону гёнгюн алма нечик бола?», «Къутгъармакъ учун ялгъан айтмакъ тюзмю?» деген соравлагъа ва башгъаларына да къонакълар  жавап­лар язды.

Буйнакск районну яшларыны пагьмуларын оьсдюреген  цент­рыны охувчулары топлагъан сынавгъа янгыз респуб­лика оьлчевде багьа берилип къалмады. Демек, генгешни алдында Москвадан шат хабар гелди – къошум билим берив тармакъда етишген уьстюнлюклери саялы Россияны билим беривге ва илмугъа  къарайгъан министерлиги булай идараланы арасында лап яхшы ишлейген идара деп белгилеген.

Буйнакск район администрациясыны башчысыны борчларын заманлыкъгъа кютеген Абдурагьман Салавутдинов генгешни гиришив сёз булан ачды:

– Районну башчысы Даниял Шихсайитовну атындан сизин ёлугъувугъуз пайдалы болмакъны ёрайман. Гьалиги яшёрюмлени тарбиялавну сан яны сизин уьстюгюзге тюше. Охувчуларыбызны 57 проценти яда 5400 охувчу къошум билим берив тармакъгъа къуршалгъан. Ону да бек агьамиятлыгъын биз англайбыз. Миллетни, халкъны, пачалыкъны гьакъыл ва яратывчулукъ даражасыны оьсювюн яш пагьмулар барлыгъы исбатлай. Биз де шолай яшёрюмлеге имканлыкълар болдурмагъа къаст этебиз, гьаракатыбызны артдырабыз. Сизин ругьугъуз, сюювюгюз, инанывугъуз пагьмулагъа ва бажарывлу яшлагъа ёл ача. Шо саялы бары­гъызгъа да баракалламны билдире туруп, уьстюнлюклер ёрайман.

Дагъыстанны билим беривге ва илмугъа къарайгъан министерлигини управлениесини начальнигини замес­тители Лариса Калмыкова жыйынны юрютдю. Ол «Таланты России» деген Россия оьлчевде оьтгерилген конкурсда биринчи ер алгъан видеофильмге къарамакъны таклиф этди. Буйнакск районну яшларыны пагьмуларын оьсдюреген  центрыны бары да янындан ишин аян этеген фильмге семинарны ортакъчылары тергевлю къарадылар.

Сонг центрны директору Аида Залимхановагъа сёз берилди. Ону сёйлевю булан бирге экранда центрны уставы ва къурулушу, тюрлю-тюрлю конкурсланы оьтгеривю,  сынавундан далиллер,  муаллимлерини дарс юрютеген къайдалары, охувчуларыны уьйренив ёллары гёрсетилди.

А. Залимханованы сёйлевю касбу ёлдашларыны тергевюн тартды: 

– Яшланы пагьмуларын ачмакъ ва оланы бажарывлугъун гёрмек учун «Лучший ученик года», «Шаг в будущее», «Слёт одаренных выпускников», «Караван духовной истории» ва шолай нече тюрлю  оьчешивлер, конкурслар, олимпиадалар оьтгеребиз. Кёбюсюню гьа­къында сизге бизден савгъат этип берилген ва биз басмадан чыгъаргъан китап­лар да методика ва методология янындан да пайдалы болур деп эсиме геле.

Къошум билим берив тармакъны алдында токътагъан масъалаланы ва оланы чечеген ёлларыны гьакъында терен маъналы докладлар булан минис­терликни экология-биология центрыны директору Мажит Багьомаев ва илму-техника цент­рыны директору Марат Алиев сёйледилер. Ишни ёрукълашдырмакъ учун не йимик чаралар гёрмекни жыйылгъанлагъа англатдылар ва оланы соравларына жаваплар бердилер.

– Дагъыстанда къошум билим беривде 6 мингге ювукъ муаллим ишлей, – деди Лариса Калмыкова. – Бизин талчыкъдырагъан масъала – биз респуб­лика оьлчевде къуршагъан яшёрюмлени санаву аз. Бизде охуйгъан яшланы тарыкълы къураллар булан таъмин этив де тергевден таймай. Шо янындан ерли муниципал бирлешивлерден, харж булан къол ялгъап болагъанлардан да кёмек ахтарма тюшер. Бу йылны ахырында бизин тармакъда ишлейген учитель касбу билими ёкълар булан да савболлашма герек болажакъ яда олар гьали ДГПУ-да уьч айлыкъ курсларын битдирип, ишин давам этмеге бола.

Озокъда, англайман – енгил тюгюл. Тек яшавну талапларына гёре биз де янашма тарыкъбыз. Бугюн гёрдюгюз чю бизин къаршылагъан центрны гьаракатын ва нечик натижалагъа етишгенин. Пагьмулу яшланы табып ва оьсдюрюп, яшавну тар сокъмакъларындан узатып, шагьра ёлгъа чыгъармагъа борчлубуз!

Буйнакск районну админист­рациясына, Аида Залимхановагъа ва ону коллективине рази­лигибизни билдире туруп, сиз де къаст этип иш гёрежегигизге инанаман, – деп тамамлады сёзюн Л. Калмыкова.

Къошум билим берив тармакъда ишлейген муаллимлени арасында оьтгерилген «Сердце отдаю детям» деген республика конкурсда уьст гелгенлеге дип­ломлар да тапшурулду. Савгъатлангъанланы бешевю – Алла Горохова, Залина Гьажиева, Агъат Гьажиев, Али Бамматов ва Шамай Магьамматова – Буйнакск районну яшларыны пагьмуларын оьсдюреген  центрыны муаллимлери.

Буйнакск районну башчысы Даниял Шихсайитовгъа районну билим берив тармагъыны оьсювюне аслам ва гёрмекли къошум этгени саялы Дагъыстанны билим беривге ва илмугъа къарайгъан министри Шагьабас Шагьовну атындан Гьюрметлев грамота тапшурулду.

Билим ва къошум билим берив тармакъда ва яш наслуну тарбиялавда етишген уьстюнлюк­лери саялы ва къайратлы загьмат тёкгени учун Аида Залимхановагъа да министр Шагьабас Шагьовну Гьюрметлев грамотасы тапшурулду.

Генгешни ахырында муллимлер ти­йишли къарар да къабул этдилер.

 Руслан Сунгуров.


Суратда: тастар согъагъан къызлар.

Авторизация
*
*
Регистрация
*
*
*
Согласны с условиями сайта?
Генерация пароля