Жамиля Ибракъова 1982-нчи йылда Хасавюрт районну Кёстек юртунда тувгъан. Агьлюсю булан Хасавюрт районну Ботаюртуна гёчген. Ботаюрт Жамиля учун экинчи ата юрту болуп токътай. 1999-нчу йылда лап яхшы къыйматлар булан Ботаюрт орта школаны 9 класын тамамлап, оьзюню юреги гиччиден муштарлы болгъан муаллим касбугъа охумакъ учун Хасавюрт шагьардагъы З. Батырмурзаевни атындагъы педагогика училищеде билимлерин камиллешдире. Дёрт йыл охуп, эсгерилген охув ожакъны къызыл дипломгъа тамамлай.
Яш муаллим къыз Жамиля Ибракъова загьмат ёлун 2003-нчю йылда оьзю билим алгъан Ботаюрт орта школада башлапгъы класланы муаллими гьисапда башлай. Шо йылларда школаны директору болуп ишлеген Фарида Муратхановна яш муаллимни ишге гьаракатын, касбу пагьмусун ва усталыгъын эс эте. Жамиля яшавда оьз ёлун тюз танглагъанына мюкюр бола.
Жамиля школада охуйгъанда, айрокъда биология дарслагъа муштарлы болгъан. Билимлерин камиллешдирмек учун ол загьматдан айрылмагъан кюйде Дагъыстан пачалыкъ университетни биология факультетинде охувун узата.
2009-нчу йылда къолуна оьр охув ожакъны дипломун ала. Къысмат буюруп, шо йыл Жамиля оьзюню агьлю яшавун тамазатёбели улан булан байлай. Шо йылдан башлап, Жамиля Ибракъова Бабаюрт районну Тамазатёбе орта школасында оьзю кёп сюеген касбусуна бериле. Янгы коллективде Жамиля иш ёлдашлары ва охувчу яшлар булан яхшы аралыкълар къурмагъа бажара. Аз заманны ичинде ол муаллимлени арасында абур да, сый да, ата-аналаны арасында гьюрмет де, баракалла да, охувчу яшланы сюювюн де къазана. Бугюнлерде ол школада 7–8-нчи класларда биология дарсланы юрюте.
Охувчу яшлар булан чакъ-чакъда табиатгъа сапаргъа чыгъалар. Бизин айланабызны къуршагъан жанлы табиатдагъы тереклени, чечеклени, оьсюмлюклени, жан-жаныварны да асырап, аявлап сакъламагъа гереклигин англатмакъны гьайын эте. Яшлар да муаллимини дарсларына кёп сююп тынглай. Билим беривде янгы къайдаланы генг кюйде къолламагъа сюеген Жамиля Ибракъова дарсларын охувчулар учун къужурлу этмекни гьайында, охувчуну тергевюн тартагъан ёлланы излей.
Тамазатёбе орта школада биология дарсланы юрютеген муаллимлерини методика бирлешивюню ёлбашчысы Людмила Нажмутдинова иш ёлдашыны гьакъында булай дей:
–Жамиля Арслановна бизин школада ишлеме башлагъанлы кёп болмай буса да, аз заманны ичинде оьзюн ишине берилген, пагьмулу усталыгъы ва касбу бажарывлугъу бар муаллим гьисапда гёрсетме бажарды. Оьзю юрютеген дарсларындан терен билимлери бар, даим де яшланы охувгъа муштарлы этеген ёлланы таба. Оьзю ёлбашчылыкъ этеген кружокда охувгъа гьасиретлиги бар, биология дарсланы кёп сюеген яшланы къуршагъан.
Оьзю танглагъан ишине уьстденсув янашмагъа тюшмейгенни яхшы англайгъан Жамиля Ибракъова яш наслуну тарбиялавда ва билим беривде белсенип чалыша. Ону охувчулары да муаллимни гьаракатын жавапсыз къоймай. Айтагъаным, дарсларда лап яхшы къыйматлар алып охуйгъандан къайры да, школа ва район оьлчевдеги ярышларда ортакъчылыкъ этип, алдынлы ерлени алып гелген гезиклери кёп болгъан. Бизин ата-бабаларыбызны сынавлу айтывларында гьакъыллы адам билимин артдырма къаст этер деген сёзлени гёз алгъа тутуп ишлейген Жамиля Ибракъова яшавун муаллим касбугъа багъышлагъан.
Уллу къызардашындан уьлгю алып, эркъардашы Марат ва къызардашы Женнет де муаллим касбуну танглагъанлар. Жамиля насипли ана да дюр. Ол агьлюсю булан эки къызны оьсдюре. Жамиля Ибракъованы ишинде уьстюнлюклер ва оьрлюклер, агьлюсюнде берекетлик ва татывлукъ, яшавунда савлукъ ва насип ёрайбыз.
Бэлла Гьажигелдиева,
Россияны журналистлерини союзуну члени.
Суратда: Жамиля Ибракъова охувчу яшлар булан.
