Сонетлер – къумукъ поэзияда


А. ЖАЧАЕВНИ ЯНГЫ КИТАБЫ



Оьтген жумагюн, сентябрни 22-синде, Магьачкъаладагъы милли китапханада Дагъыстанны халкъ шаири Агьмат Жачаевни «Сайламлы Сонетлер» деген янгы китабын малим этив болду. Мунда Къарабудагъгент, Буйнакск, Хасавюрт районланы, Магьачкъаланы ва ону айланасындагъы юртланы вакиллери, къумукъ интеллигенция, муаллимлер ва охувчу яшлар жыйылгъан эди. Жыйынны ача туруп, язывчу ва шаир Къалсын Акъгёзов ДГУ-ну дагъыстан халкъларыны адабиятларыны кафедрасыны заведующийи, филология илмуланы кандидаты Агъарагьим Солтанмуратовгъа сёз берди.



–Орта юз йыллардагъы италиян поэзиясында яралып, бир башлап гюнбатыш европалы халкъланы адабиятларында мердешленип юрюген сонет жанр, сонггъа таба оьзге адабиятларда да ва къумукъ адабиятда да оьз ерин тапгъан,–деп башлады ол сёзюн.–Башлапгъы девюрлерде сонет жанры янгыз гьашыкълыкъгъа багъышланма тарыкъ болгъан. Девюрден-девюрге, бир адабиятдан башгъа адабиятгъа гёче туруп, ону дазулары генглешме башлай.



Анадаш адабиятыбызда сонетлени яратыв Дагъыстанны халкъ шаири Агьмат Жачаев булан байлавлу. Кёп йылланы узагъында поэзияны бу тармагъында ишлей туруп, шаир мекенли сынав топлама, уьлгюлю асарлар яратма бажаргъан. Агьмат Жачаевни сонетлерини оьзтёречелигин сёйлесе, шоларда гюнбатыш европа поэзияны ва къумукъ халкъ авуз яратывчулукъну инг гёрмекли тармакъларындан бири болагъан къанна къазакъ йырланы инг тизив мердешлерини тамаша тыгъыс сыкълашывун сезесен,–деди А.Солтанмуратов, шаирни сонетлерин мисалгъа гелтире туруп.



Ондан сонг сёйлегенлер шаир Вагьит Атаев, профессор Абдулкъадир Абдулатипов, жамият чалышывчу Салав Алиев, Ленингентдеги школаны директору, Агъачавул, Къарабудагъгент, Тёбен Жюнгютей, Эндирей школаланы ана тиллерден дарс береген муаллимлери ва охувчулар шаирни яратывчулугъуну гьакъында айтды ва ону шиъруларын чебер кюйде охуду.



Агьмат Жачаевни «Сайламлы Сонетлер» деген янгы китабы шаирни яратывчулугъунда янгылыкъгъа абат алыв ва гёрмекли уьстюнлюк болуп токътай.



Авторизация
*
*
Регистрация
*
*
*
Согласны с условиями сайта?
Генерация пароля