Пагьмугъа тергев тарыкъ

Муна шолай яшавну бир нече сокъмагъындан оьтген сонг, оьзюню герти ёлуна тюшюп, ишде яхшы уьстюнлюклеге етишген борагъанлы Майса Агьматовна Бабутаеваны гьакъында язмакъны тийишли гёребиз.

М. Бабутаева 1971-нчи йыл Борагъан орта школада оьзюню анасы дарслар юрютеген 1-нчи класгъа тюше.

– Ананг дарслар юрютеген класда сагъа нечакъы да тынч болма­гъандыр? – деймен.

– Озокъда, нечакъы яхшы айтсам да, беш салмай эди, тюзю, ёлдашларым якълап эби гелеген гезиклер де бола эди.

– 1975-нчи йыл 5-нчи класда охума башлагъанда, тез-тез клас ёлбашчыбыз алышынса да, класыбыз школада лап яхшы клас саналып турду. Класдан тышдагъы охувгъа, чебер яратывчулукъгъа айрыча тергев бериле эди. Менде чебер охувгъа айрокъда гьаваслыкъ тувду, тез-тез конкурсларда ортакъчылыкъ этме, хоргъа юрюме башладым, – дей Майса.

– Муаллим касбуну атанг-анангдан варисликге къабул этдингми? – деймен.

– Мен Москвадагъы театр институтгъа барма сюйген эдим. Атам да рази эди. Атам о заман районну администрациясыны маданият бёлюгюне ёлбашчылыкъ да эте эди. Айтагъаным, район йиберип бармагъа имканлыгъым да бар эди. Анам мен йыракъгъа чыкъгъанны сюймеди. «Артист пагьму сагъа муаллим ишингде де тарыкъ болажакъ, муаллим бол», – деп къойду.

1982-нчи йыл Майса Агьматовна Мычыгъыш-Ингуш педагогика институтну филология  факультетине охума тюше.

– Институтда охуйгъанда, чебер кружокгъа кёп сююп юрюдюм, – дей.

– Сагьнада охуйгъанда яда игитни ролюн ойнайгъанда къаравчу (тынглавчу) булан аралыгъынг нечик бола? – деймен.

– Мен оьзюню ролюн ойнайгъан игитни яшавунда яшайман. Шиъру охуй бусам да, авторну ролюн ойнайман, – дей Бабутаева.

1987-нчи йыл пединститутну уьстюнлю кюйде де битдирип, юртгъа къайта, 5–6-нчы класларда орус тилден дарслар юрютме башлай.

– Бираз вакъти гетип, 5-нчи класда дарсыма о заман завуч болуп ишлейген А. Хасавов гелген эди. Дарсыма багьа берип битген сонг: «Майса Агьматовна, сенден пагьмулу артист болажакъ эди», – деди. «Болажакъ эди, охума барма къойгъан буса чы», деп эсиме гелсе де, бир зат да айтмай къойдум», – дей. Оьзюне методика якъдан кёп кёмек этген Разия Абдулатиповнаны буса уллу гьюрмет булан эсгерди.

2005-нчи йыл Гюйдюрмесге гёчмеги булан байлавлу ондагъы яшланы маданият уьюнде методист болуп ишлей. Онда хыйлы затгъа уьйрене ва оьзюн де бажарывлу касбучу гьисапда танытма бажара.

2010-нчу йыл Гюйдюрмес ра­йонну администрациясыны маданият бёлюгюню ёлбашчысы Руслан Бабишевни къаныгъывлу тилевюне байлавлу болуп Майса Агьматовна Борагъан маданият уьйню директору болуп ишлеме башлай. Маданият уьйню толу кюйде ич гёрюнюшюн янгырта, янгы техника къураллар, мебель булан ясандыра, касбучулар да къошдура, абзарын онгара. Маданият уью толу кюйде ишлеме башлай: бийив, хор, яшлар ва уллулар учун театр кружоклар ишлей, 5–8-нчи класланы охувчулары къуршалгъан «Миротворчество и толерантность» деген миллетлени дослугъун яягъан ишни юрютеген кружокгъа оьзю ёлбашчылыкъ эте. Аз вакътини ичинде маданият уьйде кёп тутумлу ва къужурлу тарбиялав гьаракатлар юрюлмеге башлай. Къумукъ ва мычыгъыш журналистлер булан ёлугъув, юрт язывчулар ва шаирлер булан ёлугъув. Шаир З. Хубиеваны яратывчу ахшамына багъышлангъан чараланы айрыча эсгерме ярай. Ватан давну ветеранлары булан гёнгюллю гьаракатчылар оьтгерген ёлугъув да уллу иш пайдалы  болду. Районну даражасында охувчулар булан оьтгерилген КВН де уьстюнлю ва маъналы оьтдю…

Юрт яшавну яхшы билеген Майса Агьматовна жамият яшавну суратлайгъан гиччирек пьесалар язып, оланы яшёрюмлер булан сагьналашдыра. «Эки гемени башын тутгъан сувгъа агъар», «Ач хадирин токъ билмес», «Азарханагъа къабул этеген уьйде» деген спектакллени къаравчулар кёп иштагьлы кюйде къабул этгенлер.

Майса Агьматовнаны бажарывлу ёлбашчылыгъы  булан маданият уьйню яратывчу коллективи этеген берекетли иш оьрде биз эсгерген гьаракатлар булан дазуланмай. Оланы берекетли ишге къурулгъан гёнгю дагъы да артыкъ натижалагъа умут этдире.

Нечакъы яхшы загьмат коллективде де яхшылардан яхшылары бола. Коллективингдеги лап яхшы къуллукъчуланы эсгермекни тилегенде, ол Зарема Хасавованы, Изета Батукаеваны, Шагьардин Козбаевни, Майна Абдуллаеваны уллу гьюрмет булан эсгерди.

Ишде етишген уьстюнлюк­лери учун Майса Агьматовна баракалла, районну даражасында гьюрметлев грамоталар ва савгъатлар булан кёп керенлер савгъатлангъандан къайры, маданият министерликни ва билим берив министерликни грамоталары булан да бир нече керен савгъатлангъан.

Барындан да уллу савгъат ону учун – юреги ушатагъан иш. Олай иш ону къастын, къасты буса бажарывлугъун гётере.  Бажарывлу къолларда от ойнар, гёнгюн шат умутлар байлар дей халкъыбыз. Биз сагъа, Борагъанны пагьмулу къызына, ишде берекетли уьс­тюнлюклер, агьлюде уллу насип ёрайбыз.

 

 

 

А. Мамаев.

Мычыгъыш Республика,

Борагъан юрт.

Авторизация
*
*
Регистрация
*
*
*
Согласны с условиями сайта?
Генерация пароля