Охувчулар – «Ёлдашда» къонакълыкъда


Зарема Шугьайыпова «Ёлдаш» газетге – 100 йыл» деген шиъруну чебер кюйде охуду ва редакцияны къуллукъчуларыны разилигин алды. Сакинат Салигьова «Ата юртум» деген Дёргелиге багъышлап язылгъан шиъруну охуду. Бу эки де шиъруну автору – Дёргели школаны тарбия ишлеге къарайгъан завучу, охувчуланы къонакълай алып гелген Магьамматбашир Атагишиев. Ол 21-нчи февральда оьтгерилеген Ана тиллени халкъара гюнюне багъышлангъан айлыгъы юрюлегенни, шону оьлчевюнде охувчу яшлар булан «Ёлдаш» газетни редакциясына, Къумукъ театргъа ва радиогъа сапар чыкъгъанны гьакъында хабарлады. Охувчу яш Магьамматарип Къапланов да А.Жачаевни «Мен къумукъман» деген шиърусун охуду. Ол оьзю де шиърулар яза экен. Тек сапар чыгъагъан гюн оланы алып гелме унутгъан.


Ана тиллерден дарс береген муаллим Марипат Насухова, охувчуланы клас ёлбашчысы Аминат Жанарсланова школада ана тилни ва адабиятны кабинети къумукъ язывчуланы, шаирлени суратлары да булан мекенли кюйде къурулгъанны гьакъында айтды. Баш редактор К.Алиев охувчулагъа Йырчы Къазакъны шиъру китапларын савгъат этди. Сонг яшлар редакциядагъы бёлюклер булан, компьютер цехни иши булан таныш болду ва сапарын узата туруп, Къумукъ театргъа ёл чыкъды.


Къарабудагъгент районну школалары охувчулар учун булай пайдалы ёлугъувлар оьтгеривде актив кюйде чалышагъанын эсгерме герек. Оьзге районлар да олардан уьлгю алса, яшлар учун пайдалы болур эди.


Бизин мухбирибиз.


Суратда: ёлугъувну вакътиси.

Авторизация
*
*
Регистрация
*
*
*
Согласны с условиями сайта?
Генерация пароля