Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Муаллимини уьлгюсюнде яшланы да тарбиялайлар

Муаллимини уьлгюсюнде яшланы да тарбиялайлар

Магьаммат-Вакил Темировну къысматы юрту ва юртуну халкъы булан теренден байлавлу. Школада муаллим , директор болуп чалышгъан йылларыны вакътисинде ол оьзю булан янаша ишлейген муаллимлеге де, охувчу яшлагъа да насигьатчы, ёл гёрсетивчю гьисапда табулгъан.

Бугюнлерде Янгы Таргъуда ерлешген 57 номерли школаны муаллимлери ва охувчу яшлары абурлу муаллими Магьаммат-Вакил Темировну яшав ва яратывчулукъ ёлуну айланасында адабият ахшам онгаргъан эди. Эсгерилген адабият ахшамны онгаргъан 57 номерли орта школаны Дагъыстан халкъланы маданиятын ва адатларын уьйретеген дарсны муаллими Зульфия Хабилова оьзлени мурадын булай англатды:

– Магьаммат-Вакил Валиакаевич Темиров Таргъу школада муаллим , школаны директору болуп кёп йыллар ишледи. Ол янгыз оьз ишин уьлгюлю оьр даражада юрютегенден къайры да, ол язгъан шиърулар, поэмалар, хабарлар да бар. Биз бугюн белгили жамият чалышывчу, муаллим, язывчу Магьаммат-Вакил Темировну эсге алма, ону уьлгюсюнде охувчуланы патриот ругьда тарбиялама, Ватанын, халкъын сюймеге, абур этмеге уьйретме жыйылгъанбыз.

Гертилей де, Янгы Таргъуда ерлешген 57 номерли школаны охувчу яшлары оьзлени муаллимлерине дарс берген Магьаммат-Вакил Темировну яшав ва яратывчулукъ ёлуну гьакъында толу кюйде хабарлады.

Оьзюню яшавун толу кюйде яш нас­луну тарбиялавгъа ва охутувгъа багъышлагъан. Ол пагьмулу язывчу ва шаир де болгъан. Оьзюню асарларында уллулагъа абур этме, Ватанын якълама ва сюйме, асил къылыкълы болма, къурдашлыкъны аяма чакъыра.

Юртну халкъы ону бир нече керен депутат этип сайлагъан. Халкъгъа билим беривде етишген уьстюнлюклери учун «Дагъыстанны ат къазангъан муаллими» деген гьюрметли атгъа лайыкълы болгъан. Ол язгъан шиърулар ва хабарлар «Тангчолпан» журналда «Ленин ёлу» ва «Ёлдаш» газетлерде печат этилген.

Магьаммат-Вакил Темировну яшавуну ва яратывчулугъуну гьакъында мунда ортакъчылыкъ этген Дагъыстанны халкъ шаири Шейит-Ханум Алишева охувчулагъа булай хабарлады:

– Магьаммат-Вакил  Темиров мени учун кёп аявлу адам эди. Мен ону агьлюсю, къызлары булан ювукъ къурдашлыкъ юрюте эдим. Ону агьлюсю мени учун уьлгюлю ожакъ эди. Оланы агьлюсю оьзден, таза къумукъ къылыкъланы, адатланы юрютюп бажара эди. Ону алдында кёп мекенли охувчулар билим алып чыкъгъан. Бугюн сизин муаллимлеригиз ону эсделигин сакълайгъаны сизге, охувчуларына да етишдирегени нечакъы да яхшы. Ону кёп яхшы къылыкъ темада язылгъан шиърулары бар. Охувчулар, сиз тергев берип охусагъыз, сизин даим юрегигизде къалажакъ. Бугюнгю чарагъыз гележек наслу учун бек пайдалы болажакъ . Кёп савболугъуз.

Бу чарада Магьаммат-Вакил Темировну уланы Алимпаша Темиров, къызы Ругьаният Темирова, 57 номерли школаны муаллимлери, «Я помощник Президента» деген къурумну ортакъчылары Марат Захратуллаев, Саният Салигьова, Ума Гьюсейнова ортакъчылыкъ этди.

Жыйынны ахырында уланы Алимпаша Темиров муаллимлеге, охувчулагъа, къонакълагъа баракалла билдирди ва булай деди:

–Бизин Таргъу школаны билим берив тарихи 1924-нчю йылда Таргъуда биринчилей ачылгъан  школадан баш ала. Ону биринчи директору бизин уллатабыз Валиакай Темиров болгъан. Таргъуда школа ачылгъандан берли,  Таргъудан белгили, оьр билимли, халкъ арада танывлу болгъан, оьр къуллукъларда ишлеген жамият чалышывчулар, язывчулар, шаирлер, белгили спортчулар оьктем болардай адамларыбыз чыкъгъан. Айтагъаным, Таргъуда тарбиялавгъа, билим беривге тезден уллу агьамият берилип юрюлген. Озокъда, о муаллимлени къастлыгъы, бажарывлугъу экенни унутма тюшмей.

Бугюн сиз оьтгерген чара, гертилей де, яш наслу учун бек герекли.

 

 

 

Патимат Бекеева.

Автор чыгъаргъан сурат.

Количество показов: 530
23.05.2014 11:38

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта