Милли маданиятыбызны гьаракатчысы…

Шавлух Ибадуллаев 1940-нчы йылда Къарабудагъгент районну Гьели юртунда тувгъан. Шо йыл буланы агьлюсю Магьачкъалагъа гёче ва Шавлух пионерлени уьюне бийив кружокгъа юрюме башлай. Москва циркини теларкъандан юрюйген артистлерини ёлбашчысы Рабадан Абакаров Магьачкъалагъа гелип,  пагьмулу  яшланы ахтарып, Шавлух Ибадуллаевни де, Алиагъа Хамдулаевни де  оьзю булан Москвагъа алып гетген. Сюзциркде ишлейген йылларында Шавлух Ибадуллаев дюньяны кёп уьлкелеринде гастролларда болгъан. 

Атасы яшавдан гетип, уллу чагъындагъы анасын сакъламакъ учун, Шавлух Дагъыстангъа къайтгъан. Шондан сонг ол  «Дагъыстан» деген бийив ва йыр ансамблинде ишлеме башлагъан. Кёп йылланы уза­гъында эсгерилген коллективде ишлеген сонг, Шавлух Ибадуллаев Къарабудагъгент районгъа къайтып, «Къарабудагъгент» деген эргишилени хоруна ёлбашчылыкъ этип тургъан. Ол ишлейген йылланы ичинде хор кёп керенлер халкъара фестивалларыны лауреаты болмагъа бажаргъан. Милли маданиятгъа этген гёрмекли къошуму саялы 2011-нчи йылда Темиркъазыкъ Кавказдан биринчилей болуп ол «Душа России» деген бютюнроссия савгъатына  ес болгъан.

Бугюнлерде Шавлух агъай пенсиягъа чыкъгъан буса да, ата юртуну жамиятына пайдалы ишлерден арекде къалмай. Сонг да, ол бизин миллетибизни йыр байлыгъын исбат этмеге герек болгъанда, намуслу кюйде табыла. Ол – бир де эринмей-талмай, милли маданиятыбызны оьр этмек  учун чалышгъан  адамларыбыздан бириси.

Бютюн яшавун маданият булан байлагъан бу адам – уллу агьлюню башы. Яшав ёлдашы Анав Ибадуллаева булан ол яшларына тюз тарбия берип, яшавда оьз ерин тапдырмагъа бажаргъан. Гьали  буса уллатасыны ва улланасыны касбусун авлетлерини авлетлери уьстюнлю кюйде узаталар.

Ата юртунда Шавлух Ибадуллаевни уьюн танымайгъан гьеч бирев ёкъдур.Тыш пачалыкълардан гелген  илму ахтарывчулар болсун, оьзге къонакълар болсун – бу ожакъны къапулары гьаман да ачыкъ бола.

Бары да юртлуларыны, къурдашларыны атындан, оьзюм­ню атымдан да Шавлух агъайны 75 йыллыкъ юбилейи булан гьакъ юрекден къутлайман.  Бизин гьюрметли тамазабызгъа энниден  сонг да оьзюню пагьмусу булан  бизин сююндюрюп яшамагъа яхшы савлукъ ёрайбыз. Бар болгъур, сав болгъур, Шавлух агъай!

 

 

Р. МУСАЕВА.

Авторизация
*
*
Регистрация
*
*
*
Согласны с условиями сайта?
Генерация пароля