Бизин Буйнакск районда «Адабиятны йылы» янгы къумукъ адабиятны кюрчюсюн салгъан машгьур шаир Йырчы Къазакъ тувгъанлы 185 йыл битегенликге байлавлу оьтгерилеген уллу оьлчевдеги шатлыкъ булан башланды.
Шо агьвалатгъа байлавлу болуп февраль айны 26-нда Буйнакск район администрацияны байрамча безендирилген уллу залына юртлардан гелеген билим берив ва маданият ожакъланы, китапханаланы, яшлар бавларыны вакиллери, шолай да адабиятны сюеген охувчулар ва кёп оьзгелер жыйыла башладылар.
Администрацияны догъасында ерлешдирилген уллу шаирни яшав ва яратывчулукъ ёлуна багъышлангъан китап, сурат ва газет выставкалар, халкъ пагьмулары оьз къоллары булан уста кюйде согъуп-тигип этген кёп тюрлю алатлар жыйылгъанланы тергевюн тартды.
Байрамны юрютеген улан да, къыз да сагьнагъа район администрацияны башчысы М. Маликовну, Дагъыстанны язывчуларыны союзуну председатели М. Агьматовну, Хасавюрт районну Ботаюртундан гелген Йырчы Къазакъны тухумуну вакиллери Алимпаша ва Къазакъ Къазакъовланы чакъырдылар.
Шатлы байрамны ача туруп, М. Маликов тил ва адабият бизин районну халкъларыны тюгесинмес байлыгъы экенин эсгерди ва Адабиятны йылы Йырчы Къазакъны яшав ва яратывчулукъ ёлуна багъышлангъан агьвалат булан ачылагъанын айтып, бары да жыйылгъанланы «Буйнакск район» деген муниципал къурулувуну башчысы Д. Шихсайитовну атындан исси сёзлер айтып къутлагъан сонг, ерли усталар арив исбарлап онгарылгъан агъачкъомузну Йырчы Къазакъны тухумуну вакили А. Къазакъовгъа савгъат этди.
Ондан сонг, жыйылгъанланы эсделик агьвалат булан Дагъыстанны халкъ шаирлери М. Агьматов, А. Жачаев, республиканы адабият савгъатыны лауреаты шаир ва редактор Б. Магьамматов, Дагъыстан пачалыкъ университетни адабият кафедрасыны заведующийи, доцент А. Солтанмуратов, адабиятны ахтарывчу ва алим М. Гьюсейнов къутладылар, оьзлени ойларын-пикруларын айтып, шиърулар охудулар.
Сагьнагъа Къазаныш ва Эрпели юртланы бирлешген халкъ хоруну ортакъчылары милли опуракъларын да гийип чыкъды ва Йырчы Къазакъны «Чатакъ йырын» йырлады.
Оьткюр пагьмусу булангъы уллу шаирибиз Йырчы Къазакъны яратывчулугъуна багъышлангъан байрамда районну школаларыны муаллимлери ва охувчулары, маданият ожакъларыны къуллукъчулары оьзлер кёп сююп уьйренген шиъруларын чебер кюйде гёнгюнден охуп да, йырлар этип йырлап да, жыйылгъанланы къурчун къандырды. «Темирхан-Шура» деген халкъ хореография ансамблини ортакъчыларыны чыгъышларына жыйылгъанланы бек кепи гелди.
Атланавулдагъы инчесаният школаны яш къомузчуларыны ансамбли сокъгъан макъамлар, къумукъ, авар, дарги тиллерде охувчулар чебер кюйде охугъан шаирни шиърулары, йырлары гьар тынглавчуну юрегине теренден таъсир этип, къурчун къандырагъаны оланы юзлеринден де гёрюнюп тура эди.
Адабият ахшамны ахырында Буйнакск районну маданият центрыны ёлбашчысы Р. Иразутдинова, шаирни юбилейине багъышлангъан чараларда жагь кюйде ортакъчылыкъ этгенлени атларын уллу гьюрмет булан эсгерип, олагъа савгъатлар гьисапда китапланы жыйымларын тапшурду.
К. КАЗИМОВ.
СУРАТДА: байрамдан гёрюнюш.
М-Гь. ЗАЙДИНОВ чыгъаргъан сурат.
