4-нчю декабрде болгъан конкурсда 6 йыллыкъ къумукъ улан Марат Акавутдинов ва Елизавета Цымбалюк бальный бийивлени бийиди. Нечик де бийимеди, уста кюйде, чартлатып, аякъ тюбюнден от чыгъарып деген кюйде бийидилер. Залдагъы халкъ чы нечик де, шонча жаваплы янашагъан жюрини членлери де оланы гьар тербенишине, бийив бажарывлугъуна харс ура эди.

Яхари, шу «алтын топ», шу чартлагъыр Москваны сагьнасында шунча халкъны гьайран этип нечик болду, къайдан чыкъгъан деген сорав оюмну къуршады. Сен бу уланпавну атын эшитгенсен, деп эсим сес бере. Герти. Мен оьзюнден баянлыкъ алагъанда ДР-ни халкъ артисти Имамутдин Акавутдинов, агьлюсюню гьакъында сорагъанда: «Мени баламны баласы Марат бийивлерден Россияны чемпиону болгъан», – деген эди. О заман биринчи гезик чемпион атгъа ес болгъан. Марат бирдагъы да, Россияны чемпионатында ортакъчылыкъ этип, утуп, эки керен чемпион атгъа ес болгъан экен.

Конкурсну юрютеген Дарья Златопольская береген соравлагъа Марат жаваплар къайтарагъан кюю чю, залдагъыланы ва жюрини бетлеринден иржайывну тайма къоймады. «Что вы говорите?» – деген Маратны сораву кёплени къурчун къандырды.

Маратны ата-анасы Артур ва Элмира бальный бийивлерден 2003-нчю йыл ­дюньяны чемпиону болгъанлар. Кёп керенлер уллу конкурсларда алдынлы ерлени алып юрюген. Маратны атасы Артур гьали Москвада латин-америка бийивлерден тренер болуп ишлей. Бу пагьмулу агьлюню Марат алгъан уьстюнлюгю булан къутлай туруп, гележекде де алдынлы ерлерде болуп, оьз миллетин оьктем этип турмакъны ёрайбыз.

 

 

Я. БИЙДУЛЛАЕВ.

СУРАТДА: Марат ва Елизавета

бийийген вакъти.